AQSHning har bir prezidenti Oq uyga kelgach, shaxsiy didi yoki siyosiy qarashlariga qarab interyerga o‘zgarish kiritadi. Prezident Donald Tramp esa maksimalizm va oltin bezaklarga bo‘lgan ishtiyoqini namoyish qildi. Business Insider nashri Oq uy dizaynidagi avvalgi va hozirgi o‘zgarishlarni taqqosladi.
Oq uyni ta’mirlash ishlari haligacha davom etmoqda. Sentyabr oyida 8 000 kvadrat metr maydonga ega, 200 million dollarlik zal qurilishi boshlanadi. U birinchi xonim ofislari joylashgan Sharqiy qanotda barpo etiladi. Tramp bu zalni “har bir AQSH prezidenti orzu qilgan joy” deb atagan.
Oval kabinetdagi o‘zgarishlar
Gilam: Baydenning Oval kabinetdagi to‘q ko‘k gilami dastlab Bill Klinton uchun mo‘ljallangan. Tramp esa uni Ronald Reygan davridagi och rangli gilam bilan almashtirdi. Gilam naqshida prezident muhri, quyosh nurlari va tinchlik ramzi bo‘lgan zaytun shoxchalari tasvirlangan.
Bayroqlar: Bayden davrida faqat ikkita bayroq bo‘lsa, Tramp armiyaning turli qo‘shinlariga tegishli bayroqlarni ham qo‘shdi. Ular orasida dengiz piyodalari korpusi va dengiz flotiga tegishlilari ham bor.
Bayden prezidentligi davrida Oval kabinetning shiftida hech qanday qo‘shimcha bezaklar bo‘lmagan. Tramp shiftdagi bo‘rtib chiqqan tasvirlarga oltin bezak qo‘shdi. Bunday bezaklar Bayden prezidentligidan beri saqlanib qolgan oltin rangli pardalarga mos keladi.
Devorlarda portretlar joylashuvi o‘zgargan: Baydenning Oval kabinetida prezident Franklin Ruzveltning portreti bor edi. U fikrlar turfa xilligini ramziy ma’noda ifodalash uchun Tomas Jefferson, Aleksandr Gamiltonning portretlarini, shuningdek, Jorj Vashington va Avraam Linkolnning portretlarini birga ilib qo‘ygan.
Tramp devorda ochiq qolgan bo‘shliqqa qo‘shimcha portretlar va ko‘plab tilla bezaklar qo‘shdi. Siyosatchi Oval ofisning devoriy galereyasini yaratish uchun bezak romli portretlarni tanladi. U Ruzvelt surati o‘rnini Jorj Vashington portreti bilan almashtirdi. Kamindagi tokchaga esa Oq uy kolleksiyasidan olingan tarixiy oltin vaza va boshqa buyumlarni joylashtirdi.
Tramp o‘z nomi tushirilgan qadah tagiga qo‘yiladigan idishga ham oltin detallarini qo‘shgan. AQSHning amaldagi rahbari oltin bezaklarga bo‘lgan qiziqishi bilan ajralib turadi. Uning Nyu Yorkdagi Trump Tower pentxausida ko‘plab zarhal shiftlar, mebellar va san’at asarlari mavjud. Prezidentning Palm-Bich shahridagi Mar-a-Lago klubida ham poldan shiftgacha oltin bilan qoplangan raqs zali mavjud.
Tramp ikkinchi prezidentlik davridan oldin Oval kabinetdagi prezident muhri oddiy edi. 1934-yilda Ruzvelt qo‘shgan gips relyefga u tilla suvi berib, muhr va yulduzlarni oltin rangga bo‘yatdi.
Portretlar va ramziy tanlovlar
Bayden kirish zalida prezident Barak Obamaning rasmiy portreti turishini tanladi. Robert Makkurdi tomonidan chizilgan giperrealistik portret 2023-yilda o‘rnatilgan. Tramp esa uni o‘z portreti bilan almashtirgan. Mark Lipp chizgan rasmda Tramp suiqasdga uchragan mitingda qo‘lini musht qilib ko‘tarayotgan holatda tasvirlangan.
Nafaqat bino ichi, balki hovli ham o‘zgarishga uchradi
1913-yilda birinchi xonim Ellen Uilson Oq uyning tashqi hovlisini rasmiy gulzorga aylantirish loyihasini ishlab chiqdi. Keyinchalik u matbuot anjumanlari va tadbirlar o‘tkaziladigan joyga aylandi. 2020-yilda birinchi xonim Melaniya esa maysazor atrofiga ohaktoshdan ishlangan chegara qo‘shdi.
Tramp “Atirgul” bog‘idagi maysalar ustidan tosh yotqizishga va uni ochiq terrasaga aylantirishga qaror qildi. U o‘tlar yirik tadbirlar uchun yaroqsiz, chunki ular nam bo‘lishi va baland poshnali poyabzal kiyganlar uchun muammo tug‘dirishini aytdi. Ishchilar iyun oyida o‘tlarni beton va tosh plitalar bilan almashtirishni boshladi.
Bayden va undan oldingi prezidentlar katta tadbirlarni ko‘pincha Sharq xonasida o‘tkazgan (sig‘imi 200 kishi). Ba’zan, masalan, 2023-yilda Avstraliya bosh vaziri Entoni Albanezni qabul qilganda, Bayden tadbirni hovlida o‘tkazgan.
Tramp 31-iyul kuni Sharqiy qanotda 650 kishilik bal zalini qurish rejasini e’lon qildi. Uning aytishicha, loyiha xarajatlari shaxsan o‘zi va boshqa “vatanparvar donorlar” tomonidan qoplanadi.
Izoh (0)