Bundan o‘n yil avval ijtimoiy tarmoqlar asosan mashhurlikka erishish va jamoatchilik ishonchini qozonish vositasi bo‘lgan bo‘lsa, bugun vaziyat butunlay boshqacha. Endilikda ko‘plab blogerlar va san’atkorlar uchun Instagram, TikTok yoki boshqa ijtimoiy platformalardagi sahifalari asosiy daromad manbai bo‘lgan biznes loyihalarga aylangan. Quyidagi Gollivudning taniqli san’atkorlari ijtimoiy tarmoqlardan qancha pul topishi haqida ma’lumot beramiz.
Selena Gomes — har bir post uchun 1,7 million dollar
Influencer Marketing Hub ma’lumotlariga ko‘ra, 2024-yilda Selena Gomes eng qimmat narxga reklama qiluvchi blogerlar uchligidan joy oldi. Birinchi o‘rinni Krishtianu Ronaldu va ikkinchi pog‘onani Lionel Messi egallagan. Uning bitta reklama posti uchun oladigan daromadi 1,7 million dollarni tashkil etadi.
Xonandaning ijtimoiy tarmoqlardagi sahifalari did va tartib bilan tuzilgan. Bu uning Rare Beauty nomli kosmetika brendini muvaffaqiyatli targ‘ib qilishda yordam bermoqda. 2020-yilda ish faoliyatini boshlagan ushbu byuti brend allaqachon 350 million dollardan ortiq daromad keltirgan.
Kim Kardashyan — bitta Instagram post uchun 1,5 million dollar
Kardashyanlar oilasi o‘zining turli shoular, tadbirkorlik obyektlari va kosmetika brendlari bilan butun boshli biznes imperiyasini qurgan. Ijtimoiy tarmoqlar esa ularning marketing strategiyasida asosiy tayanchdir. Bitta reklama posti uchun Kim Kardashyan 1 milliondan 1,5 million dollargacha gonorar oladi. Hatto oddiy stories’da ham reklama berish unga yarim million dollar daromad olib kelishi mumkin.
Kim ijtimoiy sahifasining orqasida butun jamoa mehnat qilayotgani seziladi: uning barcha postlari rejalashtiriladi, brendlar esa ehtiyotkorlik bilan tanlanadi. Kardashyan asosiy e’tiborini o‘zining KKW Beauty kosmetika liniyasi hamda Skims nomli kiyim brendini targ‘ib qilishga qaratgan. Bunday yondashuv uning auditoriya bilan ishonchli aloqani saqlab qolishiga yordam beradi.
Dueyn Jonson — bitta post narxi 1,5 million dollar
Gollivud aktyori va sobiq kurashchi Duen Jonsonning mashhurligi, sportga oid brendlardagi faol ishtiroki va keng auditoriyasi uni ijtimoiy tarmoqlardagi eng daromadli shaxsga aylantirgan. Uning Under Armour bilan hamkorligi yiliga 25 million dollargacha foyda keltiradi. Project Rock brendi ostidagi sport kiyim va aksessuarlar aynan uning targ‘iboti bilan muvaffaqiyatli sotilmoqda.
Shuningdek, Jonson 2020-yilda ishga tushirilgan Teremana tekila brendi hammuassisi hisoblanadi. U bu mahsulotni ham o‘z sahifalarida reklama qiladi va bu orqali brendning ommalashuvi yildan-yilga oshirib boradi.
Aktyor reklama postidan taxminan 1,5 million dollar daromad oladi.
Bella Hadid — bitta post uchun 300–500 ming dollar
Dunyodagi eng taniqli supermodellar qatoriga kiruvchi Bella Hadid ham reklama orqali mo‘may daromad topadi. Uning ijtimoiy sahifalari zamonaviy uslub, nafis suratlar va brendlar bilan uyg‘unlikda, tartib bilan yuritiladi.
Reklama posti uchun Hadid 300 mingdan 500 ming dollargacha gonorar oladi. Bundan tashqari, u Givenchy, Michael Kors, Charlotte Tilbury kabi yirik brendlar bilan reklama kampaniyalarida ishtirok etadi.
Heyli Biber — bitta post narxi 100–250 ming dollar
Heyli Biberning sahifalarini boshqalarnikidan ajratib turadigan asosiy jihatlar — uning tabiiy ko‘rinishi, minimalistik bo‘yanishi va oddiy uslubidir. Shu bois, ko‘plab brendlar aynan Biber xonim bilan hamkorlik qilishni istaydi. U reklama posti uchun 100 mingdan 250 ming dollargacha haq oladi.
Bundan tashqari, Heyli Rhode va Saint Laurent kabi mashhur kosmetika brendlari bilan yirik reklama kampaniyalarida ishtirok etib, million dollarlik shartnomalarga ham imzo chekadi.
Izoh (0)