“Falastin Pelesi” Sulaymon al-Ubayd G‘azo janubidagi hujumda halok bo‘ldi

Falastin Futbol Assotsiatsiyasi (PFA) 41 yoshli sobiq futbolchi, “Falastin Pelesi” nomi bilan tanilgan Sulaymon al-Ubayd G‘azo sektorining janubida gumanitar yordam kutayotgan odamlarga qilingan hujum chog‘ida halok bo‘lganini ma’lum qildi. Bu haqda The Guardian nashri xabar berdi.

Bayonotda aytilishicha, al-Ubayd chorshanba kuni Isroil kuchlari tomonidan amalga oshirilgan hujum paytida vafot etgan. 1984-yil 24-martda G‘azoda tug‘ilgan al-Ubayd futbolchilik faoliyatini “Hadamot ash-Shati” klubida boshlagan, shuningdek, “Markaz Shabab al-Amari” (G‘arbiy Sohil) va “G‘azo Sport” jamoalarida ham to‘p surgan. 2007-yilda Falastin terma jamoasida debyut qilgan futbolchi milliy terma safida 24 o‘yinda maydonga tushib, 2 ta gol muallifiga aylangan. Uning eng mashhur gollaridan biri — 2010-yilgi G‘arbiy Osiyo chempionati doirasida Yaman darvozasiga “qaychi uslubi”da kiritgan goli hisoblanadi. Umuman olganda, u faoliyati davomida 100 dan ortiq gol muallifiga aylanib, Falastin futbolining eng mashhur vakillaridan biri sifatida e’tirof etiladi.

O‘yin uslubi tufayli muxlislar unga tarixdagi eng buyuk futbolchilardan biri hisoblangan braziliyalik hujumchi Pelega qiyoslab, “Falastin Pelesi” degan laqabni bergan.

PFA ma’lumotiga ko‘ra, urush boshlanganidan beri G‘azoda kamida 662 nafar sportchi va ularning qarindoshlari halok bo‘lgan. Ulardan 421 nafari futbolchilar bo‘lib, ularning ayrimlari ochlik sabab vafot etgan.

Falastin Futbol Assotsiatsiyasi bergan ma’lumotlarga ko‘ra, G‘azo va G‘arbiy Sohilda 288 ta sport inshooti vayron bo‘lgan yoki jiddiy zarar ko‘rgan. Shundan 268 tasi G‘azo hududida joylashgan bo‘lib, ularning yarmidan ko‘pi futbolga bevosita aloqador stadionlar, maydonlar va klub binolaridir.