Nyu Yorkda sun’iy intellekt va teatr noodatiy bir loyihada birlashdi: Unitree Go2 nomli robot it “The Robot, the Spy, and the Love of AI” (Robot, josus va sun’iy intellektga muhabbat) spektaklida debyut qildi.
Ushbu komediya va ilmiy fantastika elementlarini o‘zida mujassam etgan spektakl Chain Winter One Act festivali doirasida 1-martga qadar “Chain Theater” teatrida namoyish etiladi.
Mazkur noodatiy spektakl g‘oyasi amerikalik dramaturg Jon Artur Longga tegishli bo‘lib, u ilk bor Go2 Pro robotini internetdagi videoroliklarda ko‘rib qoldi va uni sotib oldi. So‘ng Jon yangi spektakl uchun ssenariy yozdi va robotning texnik imkoniyatlaridan kelib chiqqan holda uni syujetga kiritdi. Cnet nashriga bergan intervyusida Long bu haqda so‘zlab berdi:
“Men hech qachon sahnada haqiqiy robot rol o‘ynaganini ko‘rmaganman” dedi va loyihaning o‘ziga xosligini qayd etdi.
“Tomoshabinlar Unitree G2 Pro’ni ko‘rib, uning to‘rt oyoqli Olapar obrazini gavdalantirishidan hayratda qolishi shubhasiz. Bu spektakl filmlarda aqlli mashinalarni tomosha qilish kabi oddiy emas” deydi Chain teatrining badiiy rahbari Kirk Gostkovski.
Xitoyning Unitree kompaniyasi tomonidan ishlab chiqilgan Unitree Go2 Pro roboti Boston Dynamics kompaniyasining taniqli Spot robotiga raqobatchi hisoblanadi. Uning narxi 1600 dollardan boshlanadi. Korpusi alyuminiy va muhandislik plastigidan tayyorlangan. Robotning og‘irligi taxminan 15 kg bo‘lib, 3D lidar, keng burchakli kamera, Wi-Fi 6, Bluetooth 5.2 va 8000 mA/s sig‘imli akkumulyator bilan jihozlangan.
Operator Daryel Garsiya robot harakatlarini maxsus ilova orqali boshqaradi. Uning so‘zlariga ko‘ra, 90 foiz harakatlar qo‘lda amalga oshiriladi. Robotning sakrashi va panjalar harakati kabi murakkab elementlar avvaldan dasturlashtiriladi.
Go2 Pro kuchuklarga xos harakatlarni ko‘rsatishdan tashqari, salto qilish, raqsga tushish kabilarni ham bajara oladi. Robotga real vaqt rejimida aktyor Devid Rey ovoz beradi va shu tarzda “tirik” personaj illyuziyasini yaratadi.
“Komediyada tomoshabinning munosabati muhim. Agar tomoshabin kulsa, aktyor pauza qilishi kerak. Bu jonli teatrning o‘ziga xos elementlaridan biridir”, deydi spektakl rejissyori Kirk Gostkovski.
Asar syujeti sun’iy intellekt hukmron bo‘lgan dunyoda insoniyat va tabiat o‘rtasidagi aloqalar haqidadir. Robot ishtirokida o‘tkaziladigan bunday tajriba zamonaviy texnologiyaning jonli sahnalarni qanchalik o‘zgartirishi mumkinligini namoyon qiladi. Unitree Go2 ning teatrdagi debyuti robotlarning yangi davri boshlanishini ko‘rsatib berishi mumkin.
Izoh (0)