2025-yilda mashhur oila vakili o‘zining birinchi “Oskar” haykalchasiga sazovor bo‘ldi. Uning raqobatchilari orasida Yura Borisov ham bor edi. Akasining soyasidan chiqib, o‘z yo‘lini topgan bu aktyorning ijodiy faoliyati qanday rivojlangan?
Hozirda Kiran Kalkinlar oilasining eng mashhur vakili — 30 yil davomida bu unvon Makoleyga tegishli edi. Biroq Kiran ham bu vaqt ichida salmoqli filmografiya va nufuzli mukofotlarga ega bo‘ldi. Bundan tashqari, “Haqiqiy og‘riq” filmi Kalkinning yagona ahamiyatli asari emas.
Akasining soyasida
Bo‘lajak aktyor 1982-yil 30-sentyabrda Nyu Yorkda telefonchi ayol va Brodvey aktyori oilasida dunyoga keldi. Oila boshlig‘i Kristofer Kalkinning moliyaviy qiyinchiliklari va ro‘yobga chiqmagan orzulari uni farzandlariga umid bog‘lashga majbur etdi. U yoshligidanoq bolalarini kastinglarga olib borar, biroq faqat Makoleydagina iste’dod borligiga ishonardi.
Kiran ilk bor ikki yoshida Manhetten teatri sahnasiga chiqadi. 1995-yilda ota-onasi ajrashgach, aka-ukalarning onasi Patrisiya sobiq erini to‘ng‘ich o‘g‘li karyerasining barbod bo‘lishida ayblaydi. Oilaviy munosabatlar murakkabligiga qaramay, Kiran onasi bilan yaqin aloqada qoladi.
Olamshumul mashhurlik yukini ko‘tara olmagan akasining taqdiri Kiran Kalkinga katta ta’sir ko‘rsatadi. Hatto karyerasi yuqoriga chiqqanda ham, u shovqin-surondan qochib, teatr pardasi ortida yashirinishni ma’qul ko‘radi. Kiran 40 yoshigacha hayotini kino bilan bog‘lashni istashiga ishonchi komil emasdi. Biroq u sanoat tendensiyalari ortidan quvlamasdan, sekin-asta o‘z muvaffaqiyat yo‘lini yaratdi.
“Uyda yolg‘iz” (1990)
Bosh rolga Makoley Kalkin tasdiqlanadi. Muvaffaqiyatdan ilhomlangan Kristofer Kalkin boshqa farzandlaridan ham foydalanishga uringan bo‘lsa-da, rejissyor faqat 6 yoshli Kiranni tanlaydi. “Uyda yolg‘iz” filmida yosh aktyor Kevinning amakivachchasi va oilaning eng kichik a’zosi Fuller Makkalister rolini ijro etadi.
Albatta, barcha shuhrat akasiga nasib etadi, ammo Kiran uchun bu rol katta kinoga qo‘yilgan ilk qadam bo‘lib, shu paytgacha u reklamalarda suratga tushib yurardi. Kiran Fuller roliga “Uyda yolg‘iz 2” filmida qaytadi, bu film ham katta muvaffaqiyat qozonadi.
“Kelinning otasi” (1991)
Makoleydan farqli o‘laroq, Kiran oilasi tomonidan hech qanday bosimni his qilmagan. Otasi o‘g‘lida iste’dodni ko‘rmagan, uning filmlardagi ishtiroki uchun millionlab gonorar talab qilmagan. Aynan shu narsa Kiran Kalkinga akasining taqdiridan qutulishga imkon beradi, chunki akasining Gollivuddagi karyerasi tez orada to‘xtaydi. Kiran ikkinchi darajali, ba’zida esa hatto uchinchi darajali rollar bilan qanoatlanadi.
Uning bolalar filmografiyasidagi eng e’tiborga loyiq loyihalardan biri “Kelinning otasi” bo‘ldi. Bu Kiranning kinodagi ikkinchi roli edi. Stiv Martin va Dayan Kiton ishtirok etgan komediya katta muvaffaqiyat qozonib, BMI kino mukofotiga sazovor bo‘ladi. Tomoshabinlar Kalkin kelinning ukasi rolini a’lo darajada ijro etganini ta’kidlaydi. Bu ishi uchun u “Yosh ijodkor” mukofotiga nomzod etib ko‘rsatiladi.
“Vinochilar qoidalari” (1999)
Ikkinchi jahon urushi avj olgan paytda AQSH shimoli-sharqidagi bolalar uyida fojia yuz beradi. Gomer Uellsning tarbiyalanuvchilaridan biri (Tobi Maguayr) shifokor yordamchisi bo‘lib ishlaydi. Kendi (Sharliz Teron) va uning frontga ketayotgan sevgilisi bilan uchrashgandan so‘ng, u dunyoni ko‘rish vaqti keldi deb qaror qiladi. Kiran Kalkin Gomerga qattiq bog‘langan eng yosh yetimlardan biri — Baster rolini o‘ynaydi.
Baster obrazi ekranda ko‘p ko‘rinmasa-da, “Oskar” mukofotiga sazovor bo‘lgan “Vinochilar qoidalari” filmi chiqqandan so‘ng, Kiran mustaqil san’atkor sifatida tilga olinadi. Keyinchalik uni faqat Makoley bilan bog‘lamay qo‘yishadi.
“Cho‘kayotgan Igbi” (2002)
O‘smirlik davri haqidagi tragikomediyada bosh rolni ijro etish Kiran Kalkin uchun katta yutuq bo‘ldi. Yosh Igbi Nyu Yorkning yuqori tabaqasi va oilasiga qarshi bosh ko‘taradi. Yigit isyonkor kayfiyatda, biroq kinoya ortida yolg‘izlik va tushunilishga bo‘lgan ishtiyoq yashiringan. “Cho‘kayotgan Igbi” filmi Kiranga dramatik aktyor sifatidagi iste’dodini namoyon etish imkonini berdi. Bu ish unga ko‘plab mukofotlar keltirdi, shuningdek, u ilk bor “Oltin globus”ga nomzod etib ko‘rsatildi.
Kalkinning xotirlashicha, aynan o‘sha paytda o‘zini birinchi marta haqiqiy aktyor sifatida his qilgan: u personaj xarakterini qanday rivojlantirish va suratga olish maydonida ishlash nimani anglatishini tushuna boshlagan. Bu besh hafta uning uchun aktyorlik kurslari o‘rnini bosadi. Xuddi shu yili Kiran yana bir loyihada — “Xavfli o‘yinlar”da qatnashadi. Ammo muvaffaqiyat cho‘qqisida Kalkin tanaffus olishga qaror qilib, o‘zini teatrga bag‘ishlaydi.
“Qog‘oz odam” (2009)
Yozuvchi Richard Dann (Jeff Daniels) bestseller yaratishni orzu qiladi, ammo uning kitoblari ko‘p urinishlarga qaramay, xaridorgir emasdi. Kutilmaganda u Ebbi (Emma Stoun) bilan tanishib qoladi. Ebbi uning do‘stiga aylanadi va ijodiy inqirozni yengishga yordam beradi. Kiran Kalkin Ebbining xayoliy do‘sti rolini ijro etadi, u Ebbiga yashirincha oshiq edi.
“Qog‘oz odam” filmi aktyor uchun kinoga shov-shuvli qaytish bo‘lmaydi, biroq unga Emma Stoun bilan tanishish imkonini beradi. Sevishganlar ikki yil birga bo‘lishadi, so‘ng ajralishadi. Shunday bo‘lsa-da, aktyorlar do‘stona munosabatlarini saqlab qolishadi va “Muvi 43” komediyasida birga suratga tushishadi. O‘sha paytga kelib Kalkin allaqachon Jazz Chartonga uylangandi.
“Haqiqiy og‘riq” (2024)
Muvaffaqiyatli aktyorlikdan istiqbolli rejissorlikka o‘tgan Jessi Ayzenbergning filmi amakivachchalar — Devid va Benji haqida hikoya qiladi. Ular buvilarining urush paytidagi boshidan kechirganlarini bilish maqsadida Polsha bo‘ylab sayohatga chiqishadi. Kutilmaganda omadsiz Benji roli Kalkinga ko‘plab sovrinlar va tanqidchilar e’tirofini keltiradi. “Oskar”dan tashqari, aktyor “Oltin globus”, BAFTA, Aktyorlar gildiyasi mukofoti hamda Critics Choice Awards mukofotlarini qo‘lga kiritadi.
Dastlab Ayzenbergning o‘zi bebosh aka rolini o‘ynashni rejalashtirgan, biroq loyiha prodyuseri Emma Stoun uni rejissyorlikka e’tibor qaratishga ishontiradi. Kiran Kalkin nomzodini “Vorislar” serialining katta muxlisi bo‘lgan Ayzenbergning singlisi taklif etadi. Jessining o‘zi Kirani faqat “Uyda yolg‘iz” filmidagi roli orqaligina bilardi.
E’tiborli jihati shundaki, Kalkin suratga olishlardan bir yil oldin shartnoma imzolagan bo‘lsa-da, so‘nggi daqiqalarda xotini bilan uzoq vaqt ko‘risholmasligi sababli ikkilana boshlaydi. Shunda Stoun ayyorona usul qo‘llab, agar Kiran rad etsa, “Haqiqiy og‘riq” loyihasi barbod bo‘lishini aytadi. Bu suhbatdan so‘ng aktyor hech ikkilanmay Polshaga chipta oladi.
Aytgancha, Kiran “Oskar” marosimida nutq so‘zlar ekan, agar g‘olib bo‘lsa, rafiqasi unga to‘rtinchi farzand sovg‘a qilishga va’da berganini mamnuniyat bilan aytib o‘tdi.
Izoh (0)