Ukrainani uch yillik urushdan keyin tiklash uchun 500 milliard yevrodan ortiq mablag‘ zarur bo‘ladi, deya ma’lum qildi Ukraina bosh vaziri Denis Shmigal mamlakat hukumati va Yevropa komissiyasining qo‘shma majlisida.
U ushbu ma’lumotni vazir Jahon banki, BMT va Yevrokomissiyaning Ukraina hukumati bilan hamkorlikda tayyorlagan qo‘shma hisob-kitoblariga asoslanib taqdim etdi.
500 milliard yevro miqdori Ukrainaning 2024-yilga mo‘ljallangan taxminiy yalpi ichki mahsulotidan deyarli uch baravar ko‘pdir.
Aniqlanishicha, Rossiya hujumlaridan Ukrainaga yetkazilgan to‘g‘ridan-to‘g‘ri zarar 138 milliard yevrodan 176 milliard yevroga yetdi. Uy-joy fondi, transport, energetika, savdo, sanoat va ta’lim sohalari eng ko‘p zarar ko‘rdi. Mutaxassislarning hisob-kitoblariga ko‘ra, Ukrainada uy-joylarning 13 foizi shikastlangan yoki vayron bo‘lgan. Faqatgina vayronalarni tozalash va bartaraf etish uchun kamida 12,6 milliard yevro kerak bo‘ladi. Uy-joy fondini tiklash uchun esa 84 milliard yevroga yaqin mablag‘ zarur.
Bunday tiklanish Yevropa uchun ulkan vazifaga aylanishi mumkin, bu kelgusi yillar uchun hal qiluvchi masala, deb ta’kidladi Shmigal.
Ukraina hukumati mamlakatni tiklash uchun Yevropada muzlatilgan Rossiya aktivlaridan foydalanishni taklif qilmoqda. Bosh vazirning fikricha, ularni “musodara qilish vaqti keldi”.
Vladimir Putin Ukraina energetika obyektlariga berilgan zarbalarni demilitarizatsiya jarayonining bir qismi deb atadi, chunki ular mamlakat mudofaa-sanoat kompleksiga ta’sir ko‘rsatadi.
Rossiya muzlatilgan aktivlarning bir qismini Ukrainani tiklash uchun berishi mumkin
Reuters agentligi avvalroq tinchlik kelishuvi doirasida Rossiya Markaziy bankning muzlatilgan 300 milliard dollarlik aktivlaridan Ukrainani tiklash uchun foydalanishga rozi bo‘lishi mumkinligi haqida xabar bergandi. Xususan, agentlik manbalari Kiyev 200 milliard dollar olishi mumkinligini, Rossiya esa Ukrainaning bosib olingan to‘rt viloyatini tiklash uchun qolgan 100 milliard dollarni olishni talab qilishini ma’lum qilgan.
Izoh (0)