Ukraina iqtisodiyotida 2022-yilda boshlangan urushdan keyin ilk bor Rossiyaga qaraganda nisbatan barqaror holat kuzatildi. Bu haqda The Economist xabar berdi.
Rossiyada rublning qadrsizlanishini to‘xtatish uchun esa stavkalar yaqin kelajakda 23 foizgacha ko‘tarilishi lozim, YIM esa 2025-yilda bor-yo‘g‘i 0,5-1,5 foizga o‘sishi kutilmoqda.
Shunga qaramay, Ukraina jiddiy tahdidlarga duch kelmoqda: urushning kuchayishi, ichki resurslarning qisqarishi va AQSHning saylangan prezidenti Donald Trampning ta’siri, deb yozadi The Economist.
2023-yilda Rossiya “g‘alla shartnomasi”ni uzaytirishdan bosh tortganidan so‘ng, Ukraina dron va raketalar bilan xavfsizlikni ta’minlagan holda o‘zining dengiz yo‘lagini ochdi.
Bu nafaqat don, balki mamlakatning ikkinchi muhim eksporti bo‘lgan metall va minerallar yetkazib berishni qayta tiklash imkonini berdi. Bu va G‘arb yordami tufayli Ukraina kurashni davom ettirish imkoniyatiga ega bo‘ldi, deyiladi xabarda.
Biroq hozir yangi bosqich boshlanmoqda, bu davrda iqtisodiyot eng katta muammolarga: energiya, inson va moliyaviy resurslarning keskin tanqisligiga duch kelmoqda.
Doimiy ta’mirlash ishlariga qaramay, mamlakat urushdan oldingi 36 GVt ishlab chiqarish quvvatining yarmidan kamrog‘idan foydalanishi mumkin. So‘nggi paytlarda Rossiyaning hujumlari yana avj oldi. Shunga qaramasdan, maqolada ta’kidlanishicha, mamlakat bunday to‘qnashuvlarga yaxshiroq tayyorlanib qolgan. Dekabr oyida Ukraina Yevropa ittifoqidan elektr energiyasi import qilish quvvatini deyarli chorak qismga oshirib, 2,1 GVt ga yetkazdi.
Ikkinchi va eng dolzarb muammo — ishchi kuchi yetishmasligi. 2022-yildan boshlab safarbarlik, migratsiya va urush tufayli ishchi kuchi beshdan bir qismdan ko‘proqqa, ya’ni 13 million kishiga qisqardi.
Yana bir muammo — mablag‘ tanqisligi. Kichik fermer xo‘jaliklari va korxonalar o‘z faoliyatini moliyalashtirish uchun yetarli miqdorda qarz olishi qiyin. Uzoq muddatli sarmoya kiritish deyarli imkonsiz.
The Economist ta’kidlashicha, davlat byudjetga tushumlardan ko‘proq mablag‘ sarflamoqda. 2025-yilda uning byudjet taqchilligi YIMning taxminan 20 foizini tashkil etishi kutilmoqda. To‘g‘ri, bu taqchillikning deyarli barchasi — 38 milliard dollar — tashqi manbalar hisobidan moliyalashtiriladi.
Izoh (0)