“Afrosiyob” poyezdi relsiga beton tashlab, qo‘poruvchilik qilgan temiryo‘lchilar uzoq muddatga qamaldi

Samarqand viloyatida yirik betonni yuqori tezlikda harakatlanayotgan “Afrosiyob” poyezdi relsiga tashlab qochgan qo‘poruvchilarga sud hukmi o‘qildi. Bu haqda Davlat xavfsizlik xizmati xabar berdi.

Maʼlum qilinishicha, jinoyatchilardan biri “Temiryo‘linfratuzilma” AJ Buxoro mintaqaviy temir yo‘l uzeli “Ziyovuddin temir yo‘l masofasi” korxonasida temir yo‘l to‘siqlari bo‘yicha brigadir lavozimida faoliyat yuritgan. U Navoiy shahrida yashagan, 1988-yilda tug‘ilgan. 2023-yil dekabrda korxonada brigadir shtat birligi tugatilgach, u yo‘l sozlovchisi va temir yo‘l to‘siqlari qo‘riqchisi vazifasiga ishga o‘tkaziladi.

Lekin sobiq brigadir o‘z noroziligini rahbariyatga ko‘rsatib qo‘yish maqsadida Karmana tumanida yashovchi, 1992-yilda tug‘ilgan hamkasbi bilan jinoiy reja tuzadi.

Ular joriy yil 14-yanvar kuni kechki vaqtda Samarqand viloyati Paxtachi tumani “Burqut” MFY hududida joylashgan “Ziyovuddin-Navoiy” temir yo‘l bekatlari oralig‘ining 3872-km hududiga boradi. Og‘irligi 110 kilo bo‘lgan temir-beton shpalni “Afrosiyob” elektropoyezdi harakatlanuvchi temir yo‘l relsi ustiga ko‘ndalang holatda qo‘yib, voqea joyidan yashirinadi.

“Oradan 15-20 daqiqa o‘tib, Toshkent-Buxoro yo‘nalishida 159 kilometr/soat tezlikda harakatlanayotgan, jami 148 nafar yo‘lovchisi bo‘lgan “Afrosiyob” tezyurar poyezdi temir-beton shpal bilan to‘qnashadi. Buning natijasida poyezdning harakatlantiruvchi qismlariga jiddiy shikast yetadi”, deyiladi manbada.

DXX xodimlari boshqa huquqni muhofaza qiluvchi organlar bilan hamkorlikda tezkor-qidiruv tadbirlar olib borgan. Natijada mazkur shaxslar ushlanib, ularga nisbatan Jinoyat kodeksining 161-moddasi bilan jinoiy ish qo‘zg‘atiladi hamda tergov olib boriladi.

“Jinoyat ishlari bo‘yicha Navbahor tuman sudi tomonidan esa qonunbuzarlar qo‘poruvchilik harakatini sodir etganlikda aybdor deb topilib, ularning biriga 13 yil, ikkinchisiga esa 12 yil muddatga ozodlikdan mahrum qilish jazosi tayinlandi”, deya qayd etgan DXX axborot xizmati.

O‘z navbatida qo‘poruvchilik harakati natijasida jinoyatchilar tomonidan “Afrosiyob” poyezdiga 260 million so‘m miqdorida zarar yetkazilgani aniqlangan. Pullar davlat hisobiga undirilgan.