Bugun, 14-avgust kuni Ukraina Rossiyaning Belgorod va Rostov shaharlariga dron orqali hujum uyushtirdi. Hujum oqibatida kamida 16 kishi jarohat olgan. Bu haqda DW nashri xabar berdi.
Manbaga ko‘ra, Rostovda uchuvchisiz uchish qurilmalarining zarbalari oqibatida 10 ta ko‘p qavatli uy zarar ko‘rgan. Shahar kasalxonalariga ikki nafar og‘ir ahvoldagi hamda yengilroq jarohat olgan 11 kishi yetkazilgan. Rostov viloyati gubernatori vazifasini vaqtincha bajaruvchi Yuriy Slyusarning so‘zlariga ko‘ra, jarohat olganlar orasida ikki nafar bola ham bor.
“Yetti nafar jabrlanuvchiga birinchi tibbiy yordam ko‘rsatildi, ular allaqachon uylarida. Oltitasi kasalxonalarda qolmoqda. Uylardan 212 kishi evakuatsiya qilindi. Aholi uchun vaqtinchalik joylashtirish punkti tashkil etildi”, deb yozgan Slyusar ijtimoiy tarmoqlarda.
Qayd etilishicha, 14-avgustda Belgorod viloyati hukumati binosiga ham zarba berilgan, biroq hech kim vafot etmagan. Viloyat gubernatori Vyaсeslav Gladkov Belgorodga hujumlar kun davomida ham davom etgani va uch kishi jarohat olganini aytgan.
Hujum oqibatida yengil avtomobil yonib ketgan. Belgorod markazida dronning avtomobilga urilishi video tasvirga tushib qolgan.
Dronlar hujumi sababli Belgorod hukumati 18-avgustgacha barcha ko‘cha tadbirlarini taqiqladi. 16-avgustgacha yirik savdo markazlari yopildi. Davlat muassasalari masofaviy ishlash rejimiga o‘tkazildi. Shuningdek, xususiy kompaniyalarga ham xodimlarni masofadan ishlashga o‘tkazish tavsiya qilindi.
Izoh (0)