Украинани уч йиллик урушдан кейин тиклаш учун 500 миллиард евродан ортиқ маблағ зарур бўлади, дея маълум қилди Украина бош вазири Денис Шмигал мамлакат ҳукумати ва Европа комиссиясининг қўшма мажлисида.
У ушбу маълумотни вазир Жаҳон банки, БМТ ва Еврокомиссиянинг Украина ҳукумати билан ҳамкорликда тайёрлаган қўшма ҳисоб-китобларига асосланиб тақдим этди.
500 миллиард евро миқдори Украинанинг 2024 йилга мўлжалланган тахминий ялпи ички маҳсулотидан деярли уч баравар кўпдир.
Аниқланишича, Россия ҳужумларидан Украинага етказилган тўғридан-тўғри зарар 138 миллиард евродан 176 миллиард еврога етди. Уй-жой фонди, транспорт, энергетика, савдо, саноат ва таълим соҳалари энг кўп зарар кўрди. Мутахассисларнинг ҳисоб-китобларига кўра, Украинада уй-жойларнинг 13 фоизи шикастланган ёки вайрон бўлган. Фақатгина вайроналарни тозалаш ва бартараф этиш учун камида 12,6 миллиард евро керак бўлади. Уй-жой фондини тиклаш учун эса 84 миллиард еврога яқин маблағ зарур.
Бундай тикланиш Европа учун улкан вазифага айланиши мумкин, бу келгуси йиллар учун ҳал қилувчи масала, деб таъкидлади Шмигал.
Украина ҳукумати мамлакатни тиклаш учун Европада музлатилган Россия активларидан фойдаланишни таклиф қилмоқда. Бош вазирнинг фикрича, уларни “мусодара қилиш вақти келди”.
Владимир Путин Украина энергетика объектларига берилган зарбаларни демилитаризация жараёнининг бир қисми деб атади, чунки улар мамлакат мудофаа-саноат комплексига таъсир кўрсатади.
Россия музлатилган активларнинг бир қисмини Украинани тиклаш учун бериши мумкин
Reuters агентлиги аввалроқ тинчлик келишуви доирасида Россия Марказий банкнинг музлатилган 300 миллиард долларлик активларидан Украинани тиклаш учун фойдаланишга рози бўлиши мумкинлиги ҳақида хабар берганди. Хусусан, агентлик манбалари Киев 200 миллиард доллар олиши мумкинлигини, Россия эса Украинанинг босиб олинган тўрт вилоятини тиклаш учун қолган 100 миллиард долларни олишни талаб қилишини маълум қилган.
Изоҳ (0)