Ukraina Oliy radasining mudofaa qo‘mitasi rahbari Roman Kostenko AQSH mamlakatga qurol sotishni to‘xtatganini aytdi. Biroq ukrainalik deputat va amerikalik mulozim mazkur ma’lumotni rad etdi. Bu haqda “24 Kanal” xabar berdi.
-3VDa1ntB.jpg)
Menda mavjud ma’lumotlarga ko‘ra, sotuvga chiqarilgan qurollarning yetkazib berilishi to‘xtatilgan. Bu qurollarni topshirishga tayyor bo‘lgan firmalar hozir kutishmoqda, chunki yechim yo‘q, dedi u.
Kostenko bunday qadamning sabablari hozircha noma’lum ekani, ta’minot to‘liq to‘xtamaganini aytdi. Xalqaro moddiy-texnik yordamni olish va undan foydalanishni nazorat qilish bo‘yicha Oliy Kengash komissiyasi raisi Aleksandra Ustinova esa bu ma’lumotni rad etdi.
Biz hozir juda og‘ir davrni boshdan kechiryapmiz, olovga moy sepish kerak emas, deya ta’kidladi u.
Qurol sotish to‘xtatilgani haqidagi xabarlarga Oq uy ham munosabat bildirdi. AQSH prezidentining milliy xavfsizlik bo‘yicha maslahatchisi Maykl Uolts ma’lumotni tasdiqlamadi. U harbiy yordamning asosiy qismi to‘g‘ridan to‘g‘ri AQSH omborlaridan kelayotganini aytdi.
Shu bilan birga, Uolts AQSHning qurol-yarog‘ zaxiralarini tiklash zarurati tufayli bu jarayonda ma’lum kechikishlar borligini tan oldi.
Ko‘pgina zaxiralarimiz tugab bormoqda va bu qachon yakunlanishi, yana qancha resurs talab qilinishi hamda narxi qanday bo‘lishi haqida tashvishlarni keltirib chiqarmoqda, dedi Trampning maslahatchisi.
Eslatib o‘tamiz, avvalroq AQSH prezidenti Donald Tramp ukrainalik hamkasbi Vladimir Zelenskiy go‘yoki “Qo‘shma Shtatlar Ukrainaga ajratgan mablag‘larning yarmi qayerdaligini bilmasligini” aytgandi. Bunga javoban Zelenskiy Ukraina va AQSHda “butunlay farqli raqamlar” mavjudligini ta’kidlagan.
Bizda butunlay boshqa raqamlar mavjud. Bizda hamma narsa juda aniq. Urush bizga 320 milliard dollarga tushdi. 120 milliard — bu biz, Ukraina xalqi, soliq to‘lovchilar. 200 milliard — bu AQSH va Yevropa ittifoqdoshlari. Bu qurol-yarog‘ to‘plamlari. AQSH bizga taxminan 67 milliard dollarlik qurol-yarog‘ va 31,5 milliard dollarni byudjetga to‘g‘ridan to‘g‘ri moliyaviy yordam sifatida bergan, deya aniqlik kiritdi Ukraina yetakchisi.
11-fevral kuni AQSH prezidenti harbiy yordam evaziga Ukraina AQSHga o‘z hududida qimmatbaho minerallarni qazib olishga ruxsat berishga “deyarli rozi bo‘lganini” aytgan edi. 15-fevral kuni Tramp ma’muriyati Ukrainaga mamlakatning nodir yerosti boyliklariga egalik huquqining 50 foizini AQSHga berishni taklif qilgani ma’lum bo‘ldi, ammo Zelenskiy hujjatni imzolashdan bosh tortdi. Endilikda AQSH Ukrainaga foydali qazilmalar bo‘yicha bitimning yangi versiyasini topshirdi.
Izoh (0)