Serbiya o‘z armiyasini kuchaytirishi va yadroviy urush xavfi tufayli bombapanohlar tayyorlashi kerak. Bu haqda mamlakat prezidenti Aleksandr Vuchich xabar berdi.
Ayni paytda mutlaqo tayyor emasmiz, bombapanohlarimizda 257 ming o‘rin bor. Biz boshpana sifatida 1,5 million kishini joylashtirish uchun infratuzilmani tiklashimiz kerak, dedi u.
Siyosatchiga ko‘ra, Belgrad 2011-2012-yillarda bombapanohlar holatini yaxshilash uchun byudjetdan mablag‘ ajratishni to‘xtatgan.
O‘shandan beri ular yomon ahvolga tushib qolgan, biz esa ushbu vaziyatgacha bunga e'tibor qaratmagan edik, bu ham o‘z navbatida xatolik bo‘ldi. Endi buni tizimli ravishda to‘g‘rilashimiz kerak, dedi prezident.
Ukraina va Rossiya o‘rtasidagi mojaroni muhokama qilar ekan, u Serbiya o‘z pozitsiyasiga sodiq qolishini ta’kidladi. Biroq global urush xavfi hech qachon bugungidek katta bo‘lmaganini aytdi.
Har qanday tomonning bayonoti, kamida, vaziyatni yumshatishga yordam bermaydi. Bu yanada ko‘proq mojarolar, muammolar va biz qochishga harakat qilayotgan narsa — keng ko‘lamli urushga olib kelishidan xavotirdaman, dedi Vuchich.
19-noyabr kuni Rossiya prezidenti Vladimir Putin Rossiyaning yangi yadroviy doktrinasini tasdiqladi. Hujjatga ko‘ra, Moskva dronlar, qanotli raketalar hujumlariga yoki o‘z hududining bir qismini yo‘qotish tahdidiga javoban yadro qurolidan foydalanish huquqini o‘zida saqlab qoladi.
Bu o‘zgarishlar G‘arbda reaksiya uyg‘otdi. AQSH Strategik qo‘mondonligidan kontr-admiral Tomas Byukenen Amerika yadroviy zarbalar almashishga tayyorligini aytdi. Pentagon rahbarining yadro siyosati bo‘yicha yordamchisi o‘rinbosari Richard Jonsonga ko‘ra, AQSH o‘z yadroviy salohiyatini oshirish va modernizatsiya qilishda davom etadi.
Fransiya tashqi ishlar vaziri Jan-Noel Barro Rossiya doktrinasiga izoh berar ekan, Parij Putinning yadroviy tahdidlaridan qo‘rqmasligini ta’kidladi. U G‘arb ikki yildan ortiq vaqtdan beri Moskva NATOga bosim o‘tkazishda foydalanayotgan bunday shantajlarga ko‘nikkanini bildirdi.
Izoh (0)