Tojikiston Transport vazirligi va Xitoyning Zhejiang Communications Construction Group Co. Ltd kompaniyasi Markaziy Osiyodagi eng uzun avtomobil ko‘prigini qurish bo‘yicha shartnoma imzoladi.
Loyihaning umumiy qiymati 427,5 mln yuan (taxminan 59,8 mln dollar)ni tashkil etadi.
Kelishuvga ko‘ra, ko‘prik Obigarm–Nurobod avtomobil yo‘li loyihasini amalga oshirishning uchinchi bosqichi doirasida quriladi. Ko‘prikning uzunligi 920 metr bo‘lib, kirish yo‘llari bilan uzunligi 1,5 km ga yetadi. U Nurobod tumanidagi Surxob daryosi orqali barpo etiladi.
Qurilish 4 yil ichida, ham mahalliy, ham xorijiy tajribali mutaxassislar ishtirokida amalga oshirilishi kerak, biroq, Tojikiston transport vaziri Azim Ibrohim ta’kidlaganidek, ishlarni muddatidan oldin yakunlash imkoniyati ham mavjud.
Yangi Obigarm–Nurobod yo‘li Rog‘un GES qurilishi doirasida suv ostida qoladigan mavjud yo‘lga muqobil bo‘ladi.
Zhejiang Communications Construction Group Co. Ltd vakili Li Minkunning ta’kidlashicha, kompaniya Tojikistonda bir necha yillardan beri faoliyat yuritadi va yo‘l hamda ko‘priklar qurilishi loyihalarini amalga oshirishda katta tajribaga ega.
Zhejiang Communications Construction Group Co. Ltd — Xitoyning transport infratuzilmasi obyektlarini qurishga ixtisoslashgan davlat korporatsiyasi. Kompaniya portlar, port uskunalari, suv tubini chuqurlashtirish, shuningdek, turar-joy va tijorat obyektlari, avtomobil yo‘llari, ko‘priklar, temir yo‘llar, metro va aeroportlarni loyihalash va qurish bo‘yicha jahon yetakchilaridan biri hisoblanadi.
Kompaniya 139 ta mamlakatda faol ish olib boradi va ko‘plab yirik loyihalarni, jumladan, yuk aylanmasi bo‘yicha dunyodagi 10 ta eng yirik portdan 7 tasini, shuningdek, dunyodagi eng uzun ko‘priklarni loyihalash, qurish va jihozlashni amalga oshirgan. Kompaniyaning yutuqlari orasida 36 km uzunlikdagi dunyodagi eng uzun Xanchjou Bey dengiz ko‘prigi va Belgiyaning Antverpen porti uchun eng katta shlyuz darvozalari qurilishi mavjud.
Izoh (0)