Тожикистон Транспорт вазирлиги ва Хитойнинг Zhejiang Communications Construction Group Co. Ltd компанияси Марказий Осиёдаги энг узун автомобиль кўпригини қуриш бўйича шартнома имзолади.
Лойиҳанинг умумий қиймати 427,5 млн юан (тахминан 59,8 млн доллар)ни ташкил этади.
Келишувга кўра, кўприк Обигарм–Нуробод автомобиль йўли лойиҳасини амалга оширишнинг учинчи босқичи доирасида қурилади. Кўприкнинг узунлиги 920 метр бўлиб, кириш йўллари билан узунлиги 1,5 км га етади. У Нуробод туманидаги Сурхоб дарёси орқали барпо этилади.
Қурилиш 4 йил ичида, ҳам маҳаллий, ҳам хорижий тажрибали мутахассислар иштирокида амалга оширилиши керак, бироқ, Тожикистон транспорт вазири Азим Иброҳим таъкидлаганидек, ишларни муддатидан олдин якунлаш имконияти ҳам мавжуд.
Янги Обигарм–Нуробод йўли Роғун ГЭС қурилиши доирасида сув остида қоладиган мавжуд йўлга муқобил бўлади.
Zhejiang Communications Construction Group Co. Ltd вакили Ли Минкуннинг таъкидлашича, компания Тожикистонда бир неча йиллардан бери фаолият юритади ва йўл ҳамда кўприклар қурилиши лойиҳаларини амалга оширишда катта тажрибага эга.
Zhejiang Communications Construction Group Co. Ltd — Хитойнинг транспорт инфратузилмаси объектларини қуришга ихтисослашган давлат корпорацияси. Компания портлар, порт ускуналари, сув тубини чуқурлаштириш, шунингдек, турар-жой ва тижорат объектлари, автомобиль йўллари, кўприклар, темир йўллар, метро ва аэропортларни лойиҳалаш ва қуриш бўйича жаҳон етакчиларидан бири ҳисобланади.
Компания 139 та мамлакатда фаол иш олиб боради ва кўплаб йирик лойиҳаларни, жумладан, юк айланмаси бўйича дунёдаги 10 та энг йирик портдан 7 тасини, шунингдек, дунёдаги энг узун кўприкларни лойиҳалаш, қуриш ва жиҳозлашни амалга оширган. Компаниянинг ютуқлари орасида 36 км узунликдаги дунёдаги энг узун Ханчжоу Бей денгиз кўприги ва Бельгиянинг Антверпен порти учун энг катта шлюз дарвозалари қурилиши мавжуд.
Изоҳ (0)