Tojikistonning Xo‘jand shahrida 31-mart kuni Qirg‘iziston, Tojikiston va O‘zbekiston prezidentlari ishtirokida tarixda ilk bor uch tomonlama sammit bo‘lib o‘tadi. Bu haqda Qirg‘iziston Vazirlar Mahkamasi raisi o‘rinbosari Edil Baysalov Jenevada BMT Inson huquqlari bo‘yicha kengashining 58-sessiyasida ma’lum qildi.
Baysalov o‘z nutqida Qirg‘iziston va Tojikiston o‘rtasidagi davlat chegarasi chizig‘i uzil-kesil kelishilganini aytdi va bu voqeani “diplomatiya va siyosiy irodaning tarixiy g‘alabasi” deb atadi. U erishilgan kelishuv Qirg‘iziston prezidenti Sadir Japarovning “mintaqada tinchlik va barqarorlikni ta’minlash yo‘lidagi tinimsiz sa’y-harakatlari” tufayli amalga oshganini ta’kidladi.
Bo‘lajak Xo‘jand sammiti uch mamlakat o‘rtasidagi mintaqaviy hamkorlikni mustahkamlashda muhim qadam bo‘ladi. Yetakchilar Markaziy Osiyoda xavfsizlik, barqarorlik va farovonlikni ta’minlashga qaratilgan hamkorlikning asosiy masalalarini muhokama qilishi kutilmoqda.
21-fevral kuni Qirg‘iziston va Tojikiston qirg‘iz-tojik chegarasini delimitatsiya qilish bo‘yicha yakuniy protokolni imzoladi.
Bir qator hujjatlar, jumladan, davlat chegarasi to‘g‘risidagi shartnoma, energetika obyektlari va suv resurslari bo‘yicha hukumatlar o‘rtasidagi kelishuv, chorrahalardagi avtomobil yo‘llaridan foydalanish va yangi yo‘llar qurish to‘g‘risidagi bitim tayyorlandi. Hujjatlar ikki mamlakat prezidentlari tomonidan imzolanishi kutilmoqda.
♦ 8-yanvar kuni O‘zbekiston, Qirg‘iziston va Tojikiston hukumatlari rahbarlari uch tomonlama uchrashuv o‘tkazadi. Tomonlar o‘rtasida davlat chegaralari masalalari bo‘yicha ilgari erishilgan kelishuvlarga oid muzokaralar bo‘lib o‘tgan. Qirg‘iziston Xitoy, Qozog‘iston, Tojikiston va O‘zbekiston bilan chegaradosh. Xitoy va Qozog‘iston bilan chegara bo‘yicha barcha bahsli masalalar bir necha yil oldin hal qilingan.
O‘zbekiston va Tojikiston bilan tegishli kelishuvlarni faqat 2023 va 2024-yillarda imzolashga muvaffaq bo‘lindi. Avvalroq Qirg‘iziston prezidenti Sadir Japarov uning mamlakati O‘zbekiston va Tojikiston bilan barcha hududiy kelishmovchiliklarni hal qilganini aytgandi.
Izoh (0)