“Tolibon” 8-iyul kuni Tojikiston bilan chegaradosh Panj daryosidagi ko‘prikda o‘z bayrog‘ini ko‘tardi. Bu haqda “RIA Novosti” xabar berdi.
“5-iyul kuni Afg‘oniston hukumati qo‘shinlarining chegara postini egallab olgan ‘Tolibon’ bugun (8-iyul) Panj daryosini kesib o‘tgan Tojikistonning “Tem” nazorat punkti qarshisidagi ikki davlatni bog‘lovchi ko‘prikning yon tomonidagi ustunga bayroq o‘rnatdi”, — dedi Tojikistonning Tog‘li Badaxshon avtonom viloyati ma’muriyati vakili.
Ta’kidlanishicha, 5-iyulga o‘tar kechasi hujumga o‘tgan “Tolibon”ga afg‘on chegarachilari nazorat punktini jangsiz topshirgan. Ushbu ko‘prik orqali 312 nafar chegarachi va harbiy xizmatchilar Tojikiston hududiga o‘tishga muvaffaq bo‘lgan.
“Sputnik Tajikistan” xabariga ko‘ra, Kollektiv xavfsizlik shartnomasi tashkiloti (KXShT) qo‘shma shtabi boshlig‘i general-polkovnik Anatoliy Sidorov “Tolibon” tojik-afg‘on chegarasining deyarli yuz foizini nazorat qilayotganini aytdi.
“Bir oy oldin ‘Tolibon’ vakillari Afg‘oniston davlat chegarasining qismlarini egallashni boshladi. Iyul oyining boshiga kelib ular chegaraning 700 kilometrni o‘z nazoratiga oldi. Biz Tojikistonga kelgan vaqtga qadar deyarli butun davlat chegarasi to‘liq nazoratga olingan edi. Tojikiston Respublikasi bilan ushbu chegara qismi 1344 kilometrni tashkil qiladi”, — deya ta’kidladi Sidirov.
“Tolibon” vakili Zabiulla Mujohid “RIA Novosti” bilan suhbatda jangarilar Afg‘onistonning turli viloyatlaridagi jami 169 ta tumanni egallab olganini aytdi.
Harakat vakilining so‘zlariga ko‘ra, so‘nggi ikki oy ichida “Tolibon” 400 ga yaqin tumanning 167 tasini egallab olgan, 7-iyul kuni yana ikkita tuman — Hirot va Zobulni o‘z nazoratiga olgan. “Bizning mujohidlarimiz tomonidan qo‘lga kiritilgan tumanlarning umumiy soni 169 taga yetdi”, — dedi Zabiulla Mujohid agentlikka.
Shuningdek, “Tolibon” mamlakat hududining 85 foizi ustidan nazorat o‘rnatganini da’vo qilmoqda. O‘z navbatida, Afg‘oniston Mudofaa vazirligining sobiq vakili general Davlat Vaziriy bu bayonotni rad etdi.
“Tolibon’ning da’vosi haqiqatga to‘g‘ri kelmaydi, ilgari ham harakat vakillari hududlarning 60 yoki 70 foizidan ko‘prog‘ini nazorat qilayotgani haqida asossiz gapirgan”, — dedi u.
Ayni paytda, xavfsizlik va mudofaa sohasi vakili general Ajmal Shinfarining aytishicha, hududlar jangarilar qo‘liga o‘tmagan, xavfsizlik kuchlari tuman uchun kurashish maqsadida qayta to‘planish doirasida taktik chekinishni amalga oshirgan. Uning so‘zlariga ko‘ra, yaqinda harbiylar 14 tumanni qaytarib olgan.
“Tolibon” harakati Afg‘onistonning Eron bilan chegarasidagi nazorat-o‘tkazish punktini egallab oldi. Bu haqda Associated Press (AP) afg‘on rasmiylari va mahalliy ommaviy axborot vositalariga tayanib xabar berdi.
“Tolibon” vakilining Twitter’da ma’lum qilishicha, nazorat punkti joylashgan Islom Qal’a shahrida mahalliy aholi jangarilarni iliq kutib olgan. Shuningdek, u jangarilar o‘zlarining yuk mashinalarini shahar bo‘ylab haydab o‘tayotgani va olomon ularni olqishlab kutib olayotgani aks etgan videoni joylashtirdi.
Islom Qal’a — g‘arbiy Hirot viloyatidagi chegara yoqasida joylashgan aholi punkti. U viloyat markazidan 120 km uzoqlikda joylashgan. Eron OAV xabarlariga ko‘ra, shaharda bo‘lgan afg‘on askarlari o‘z pozitsiyalarini tark etib, boshpana izlab Eronga yo‘l olgan.
Mavzuga doir:
Izoh (0)