Kino sanoatida aktyorlarga mashhurlik keltirgan salbiy obrazlar ko‘plab tomoshabinlarning nafratiga duchor bo‘lishi ko‘p uchraydi. Quyidagi kino yulduzlar birgina obrazi orqali dunyo bo‘ylab shuhrat qozongan bo‘lsa-da, kinodagi rol va real hayotdagi insonlarni bir-biridan farqlay olmaydigan muxlislarning tanqidlari ostida qolgan.
“Jirkanch Garri” filmidagi Endi Robinson
1971-yilda chiqqan mazkur detektiv trillerda politsiyaning shafqatsizligi va fuqarolik huquqlarining buzilishini haqidagi kadrlar ko‘plab bahs va munozaralarga sabab bo‘lgan. Endi Robinsonning qahramoni seriyali qotil bo‘lib, jinoyatchilarni yo‘q qilishda o‘zining qattiqqo‘lligi va shafqatsizligi bilan ajralib turadi.
Uning ijrosi shunchalik ishonarli chiqqan ediki, aktyorga noma’lum shaxslar hatto o‘lim bilan tahdid qilishgan. Endi Robinson gavdalantirgan obraz aslida real voqealarga asoslangan bo‘lib, bu fakt vaziyatni yanada murakkablashtirgan. “Jirkanch Garri” filmi muvaffaqiyatidan so‘ng aktyor bir muncha vaqt psixopat odamlar rolini ijro etishda davom etgan.
“Yulduzlar jangi” filmidagi Kelli Mari Tran
Aktrisa Kelli Mari Tran “Yulduzlar jangi: so‘nggi jeday” filmida Rouz Tiko rolini ijro etgan. Filmda u jasur va fidoyi xarakterga ega shaxs bo‘ladi. Rouz Qarshilik harakatining a’zosi sifatida janglarda o‘z o‘rnini topishga harakat qiladi va hatto bosh qahramonning hayotini saqlab qoladi.
Ammo uning obraziga ko‘plab salbiy munosabatlar bildirildi, chunki ba’zi tomoshabinlar uning xarakterini va o‘yinga qo‘shilgan yangi qahramonni qabul qilishni istamadi. Bu holat nafaqat tanqidga, balki aktrisaning shaxsiga nisbatan nafratga ham olib keldi. Ijtimoiy tarmoq foydalanuvchilari aktrisani irqiy kamsitar edi (Kelli Mari Tran kelib chiqishi vyetnamlik bo‘lgan Amerika fuqarosi edi). Ta’qiblar va tahdidlarning soni kamaymagach, aktrisa ijtimoiy tarmoqlarni tark etishga majbur bo‘lgan.
“Titanik” filmidagi Billi Zeyn
Rejissyor Jeyms Kemeronning “Titanik” filmida Kel Hokli roli bilan mashhur aktyor Billi Zeyn qahramonini gavdalantirganida 30 yoshda edi. U badavlat va o‘qimishli, ammo kibrli va manipulyator shaxs sifatida ko‘rsatilgan. Uning Rouz bilan munosabatlari Jek tufayli keskinlasha boshlagach, Kel qing‘ir ishga o‘tadi: yozuv qahramon Jekni o‘g‘rilikda ayblaydi va shu tariqa undan qutulishga harakat qiladi.
Billi Zeynning ajoyib ijrosi muxlislarda katta nafrat uyg‘otgan. Shundan so‘ng u ko‘proq salbiy qahramonlarni o‘ynay boshladi. Masalan, “Kelajakka qaytib” filmining ikkinchi qismida Billi Zeyn bezori yigitlardan birini ijro etgan.
“Sumerki” filmidagi Kristen Styuart
“Sumerki” filmi Kristen Styuartga shon-shuhrat olib kelish bilan bir qatorda, u his-tuyg‘ularini ifoda etish qobiliyatiga ega bo‘lmagan aktrisa sifatida ham qabul qilindi. Shu sababli Kristen tom ma’noda masxara obyektiga aylanib qoldi.
O‘zingiz haqingizda paydo bo‘lgan fikrni rad etish oson bo‘lmasligi mumkin, ammo Styuart buni ajoyib tarzda amalga oshirdi. U “Shaxsiy xaridor” psixologik trilleridagi obrazi orqali Styuart iste’dodli aktrisa ekanligini isbotlab berdi. Kanndagi film premyerasidan so‘ng tomoshabinlar taxminan 4 daqiqa tik turib qarsak chalishdi.
Aktrisaning so‘nggi tahsinga sazovor loyihasi — “Spenser” filmidagi malika Diana roli bo‘ldi. Ushbu obrazidan so‘ng aktrisani “Oskar” nominatsiyasi uzoq kuttirmadi.
“Mashaqqatlar sari” filmidagi Anna Gann
Jinoyatchilar va sotsiopatlar bilan to‘la ushbu filmda shahar chetida yashovchi oddiy uy bekasi tomoshabinlarning nafratiga duchor bo‘lishini hech kim kutmagan edi. Anna Gann ijro etgan Skayler Uayt qahramoni turmush o‘rtog‘i Uoalterning noqonuniy harakatlaridan shubhalana boshlaydi va oilasini xavfdan olib chiqishga harakat qiladi.
Skayler obrazi mukammal bo‘lmasa-da, uning harakatlari va motivlari real hayotdagi bekalarnikiga xosdir. Shunga qaramay, personaj ko‘plab tomoshabinlar tomonidan ijobiy qabul qilinmadi va Anna Gann onlayn ta’qiblar nishoniga aylandi. Vaziyat shu qadar jiddiy ediki, aktrisa hatto The New York Times gazetasida bu haqda maqola yozdi. Yillar o‘tib aktrisaga yoziladigan salbiy izohlar soni kamayib bordi.
Izoh (0)