Bollivudda ba’zi sevgi hikoyalari ertakdek boshlangan bo‘lsa-da, kutilmaganda yakun topgan. Ayrim mashhurlar hatto unashtirilgan, biroq turmush qurish nasib etmagan. Bugungi maqolada shov-shuvli munosabatlari to‘ygacha yetib bormagan hind kinosining yulduzli juftliklari haqida so‘z boradi.
Abhishek Bachchan va Karishma Kapur
Bollivudning eng badavlat oilalaridan chiqqan bu ikki san’atkor 2002-yilda unashtirilgunga qadar uzoq vaqt — 5 yil davomida uchrashib yurgan. Unashtiruv 2002-yil oktyabr oyida, Amitabh Bachchanning tug‘ilgan kunida bo‘lib o‘tgan. Ammo ularning baxtiyor munosabatlari uzoqqa cho‘zilmadi va 2003-yil fevral oyida ularning fotihasi buzildi. Ba’zi xabarlarda Karishmaning onasi Babitaning bunga sababchi bo‘lganligi aytilsa, boshqa manbalarda Karishma turmush qurganidan keyin Bachchanlar oilasi tomonidan filmlarda rol o‘ynashiga ruxsat berilmagan, deyildi.
Biroq Abhishek va Karishmaning ajralish sababi oshkor etilmadi va ikkala oila bu masalada sukut saqlashni lozim topdi. Ma’lum vaqtdan so‘ng Karishma Sanjay Kapurga turmushga chiqdi, lekin ular ajrashib ketdi. Hozirda aktrisa ikki farzandning yolg‘iz onasi, Abhishek esa Ayshvariya Rayga uylangan va ularning Aaradha ismli qizi bor.
Salmon Xon va Sangita Bijlani
Salmon Xon va Sangita Bijlani 1980-yillarning oxiri va 1990-yillarning boshlarida Bollivudning eng ko‘p muhokama qilingan juftliklaridan biri bo‘lgan. Ularning munosabatlari juda jiddiy bo‘lib, hatto 1994-yil 27-may sanasiga belgilangan to‘y uchun taklifnomalar ham bosmadan chiqarilgan edi. Ammo to‘y oldidan noma’lum sabablarga ko‘ra ular ajralishdi. Keyinchalik Sangita Bijlani kriket o‘yinchisi Muhammad Aaruddinga turmushga chiqdi, ammo ular 2010-yilda ajrashishdi.
Ko‘p yillar o‘tib, turli manbalarda ajralishga sabab sifatida Salmon Xonning beqaror xulq-atvori va sodiqlik masalalari ko‘rsatilgan. Biroq, ajralishlariga qaramay, Salmon va Sangita yaxshi do‘st bo‘lib qolishdi. Hozirda ham ular bir-biriga hurmat bilan munosabatda bo‘lib, turli tadbirlarda uchrashib turishadi.
Akshay Kumar va Ravina Tandon
Akshay Kumar va Ravina Tandon 1990-yillarda Bollivudning eng mashhur juftliklaridan biri bo‘lgan. Ularning muhabbati “Piyoda” (1994) filmi suratga olish jarayonida boshlangan va tez orada jiddiy munosabatga aylangan. Ravinaning aytishicha, ular hatto maxfiy tarzda unashtirilgan va Akshay unga turmush qurishga va’da bergan.
Ammo vaqt o‘tishi bilan Akshayning boshqa aktrisalar bilan yaqinligi, xususan, Shilpa Shetti bilan munosabatlari sababli juftlik o‘rtasida kelishmovchiliklar yuzaga kelgan. Ravina bu holatlarga chiday olmagan va 1990-yillarning oxirida ular ajralishgan. So‘ng Ravina Anil Tadani bilan turmush qurdi, Akshay esa Tvinkl Xanna bilan oila qurib, baxtli hayot kechirmoqda.
Karishma Tanna va Upen Patel
Karishma Tanna va Upen Patelning muhabbati "Bigg Boss” realiti-shousida boshlangan. Ular ko‘rsatuvda tanishib, tez orada juftlik ekanligini e’lon qilgan. O‘sha vaqtda tomoshabinlar Karishma va Upenni mukammal juftlik deb atagan. Upen 2015-yilda Karishmaga sovchi qo‘yib, shouning o‘zida unga turmush qurish taklifini bildirgan:
Ammo 2016-yilda ular ajralishgani haqida e’lon qilishdi. Buning sababini aniq oshkor qilishmagan bo‘lsa-da, Upen munosabatlarda ba’zi muammolar bo‘lganini tan olgan. Bugungi kunga kelib, har ikkisi o‘z hayot yo‘lini tanlab, shaxsiy karyerasini qurish bilan band.
Vivek Oberoy va Gurprit Gill
Vivek Oberoy va Gurprit Gill bir vaqtlar jiddiy munosabatda bo‘lgan va hatto unashtirilgan edi. Ularning muhabbati Bollivudda mashhur bo‘lishdan avval boshlangan bo‘lib, Vivek hali aktyor sifatida tanilmagan edi.
Ammo Vivekning aktyorlik karyerasi rivojlanib, hind kinosi yulduziga aylanganidan so‘ng, ularning munosabatlari o‘zgarib ketgan. Ish jadvali zichligi va dunyoqarashlarning o‘zgarib ketishi sababli Vivek va Gurprit o‘rtasida kelishmovchiliklar yuzaga kelgan va oxir-oqibat ular ajralishgan. Shundan so‘ng Gurprit Bollivud olamidan uzoqroq bo‘lishni tanlagan, Vivek esa 2010-yilda Priyanka Alva bilan turmush qurdi va hozirda oilasi bilan baxtli hayot kechirmoqda.
Izoh (0)