Aytishlaricha, go‘zallik tanlovlarida g‘alaba qozonish bu — Bollivud olamiga to‘g‘ridan to‘g‘ri chipta hisoblanadi. Bir qancha hind aktrisalari kinomotografiyaga kelishdan avval xuddi shu yo‘ldan o‘tgan: Zinat Aman, Juhi Chavla, Sushmita Sen, Ayshvariya Ray, Priyanka Chopra va boshqalar. Ulardan yana biri “Hindiston go‘zali” toji sohibasi, keyinchalik kino aktrisasi Sonu Valiya edi.
Sonu 1964-yil 19-fevralda panjob oilasida tug‘ilgan. Qizaloqning to‘liq ismi Sanjit Kaur Valiya bo‘lib, uni ota-onasi erkalab kichik singlisi – Monuga monand Sonu deb chaqirishardi. Sonuning otasi – Satinder Singx Valia hind armiyasi ofitseri, onasi Damanjit xonim esa uy bekasi bo‘lgan.
Jurnalistika va psixologiya fakulteti bitiruvchisi Sonu o‘qish u uchun asosiysi emasligini tushunib yetgach, o‘zini modellikda sinab ko‘radi va aynan shunda Valiyaning o‘ziga xos qirralari ochiladi. Baland bo‘yli, qoramag‘iz bu yoqimtoy qiz bir qarashda hammani maftun qiladi — birin-ketin podium va reklamalarda ko‘rinish bera boshlaydi.
Shubhasiz, u 1985-yilda o‘tkazilgan “Hindiston go‘zali” tanlovi ishtirokchisiga aylanadi — 21 yoshli Sonu hech bir qiyinchiliklarsiz orzu qilgan oliy sovrin sohibasi bo‘ladi.
Shundan so‘ng qizga darhol qiziqish bildirishadi. Rejissyor Tanvir Ahmed uni romantik drama “Tortishuv” (Akarshan) filmiga bosh qahramon roliga taklif qiladi, ammo loyiha to‘xtatiladi va bir necha yillardan so‘nggina ekranlarga chiqadi.
Aktrisani taniganlar uni ilk debyut roli “Qasos o‘ti” filmidagi obrazi deb hisoblashadi, lekin Sonu 1986-yilda “Shart” jinoiy trillerida Nosiruddin Shoh va Shabanoy Azmi bilan rol o‘ynagan.
Keyin Rakesh Roshanning superxiti “Qasos o‘ti” filmida Rekhaning dugonasi obrazida namoyon bo‘ldi. Ushbu filmda u salbiy rol o‘ynaganiga qaramay aktrisa mahorati tanqidchilar tomonidan yuqori baholanadi va Sonu Filmfare’da ikkinchi plandagi eng yaxshi ayol aktrisa nominatsiyasini qo‘lga kiritadi. Sonuning karyerasida hozirgi kunga qadar ham “Qasos o‘ti” filmidagi roli eng yaxshi xit obrazi bo‘lib qolmoqda.
Keyingi “Buyuk Xudo”, “Klerk”, “To‘fan” filmlaridagi obrazlari omadli bo‘lmaydi. Lekin ikkinchi film aktrisaga mahoratli rejissyor Manmoxan Desay va superyulduz Amitabh Bachchan bilan birga rol o‘ynash imkoniyatini beradi.
Sonuning baland bo‘yi uni nafaqat jozibali ko‘rsatar, shu bilan birga bir qancha to‘siqlarga ham sabab bo‘lgan. Masalan, aktrisa aynan bo‘yi sababli mahoratli va taniqli aktyorlar Salmon Xon, Shoxruh Xonlar bilan partnyor bo‘lolmagan.
90-yillarda Bollivudda uch Xon — Amir, Salmon va Shohrux Xonlar paydo bo‘ldi. Ular Amitabh Bachchan, Dharmendra va Vinod Khanna kabi baland bo‘yli emasdi. Bo‘yi 173 santimetr bo‘lgan Sonu Valiya Xonlardan ancha baland edi va bu uning karyerasiga sezilarli taʼsir ko‘rsatdi.
U talab yuqori bo‘lgan yangi aktyorlar bilan juftlikda o‘ynay olmaydi va bir necha bor intervyularda Amir va Salmon bilan o‘ynash imkoniyatini yo‘qotganidan afsuslanib gapiradi. Ammo 90-yillar boshiga kelib Bollivudda yangi qahramonlar orasida raqobat yuzaga keladi. Masalan, Puja Bhatt, Ravina Tandon, Manisha Koyrala, Karishma Kapur va boshqa aktrisalar ekranlarga chiqa boshlaydi.
O‘sha vaqtga kelib u o‘z jufti Suryu Pratapa Singxni uchratadi. Kinoprodyuser, Amerikadagi mehmonxonalar egasi turmush qurganlaridan keyin aktrisani Amerikaga olib ketadi. Er-xotin u yerda baxtli yashaydi, lekin bu baxt uzoqqa bormaydi.
2009-yil aktrisaning eri buyrak yetishmovchiligidan vafot etadi. Beva qolgan Sonu singlisi Monu, kuyovi Vinit Sharma va jiyani bilan yashash uchun Hindistonga qaytadi.
Aytishlaricha kinosanoatiga kelgan inson uni hech qachon tark etolmas ekan. Bu gapni tasdig‘i sifatida Sonu ham 2018-yilda kinoga qaytadi, bu safar prodyuser sifatida.
U o‘z karyerasini yoqimli xotiralar bilan eslaydi. Ha bu go‘zallik malikasining muvaffaqiyati qisqa, ammo esda qolarli edi. Ehtimol, u 10 yil oldin tug‘ilganida yaʼni, 80-yillarning emas, 70-yillar aktrisasi bo‘lganida, shubhasiz, superyulduzga aylangan bo‘lardi.
Izoh (0)