АҚШ президенти Дональд Трамп Фаластиннинг ҲАМАС ҳаракатидан барча гаровдаги исроилликларни 15 февраль куни соат 12:00 гача озод қилишни талаб қилмоқда.
Шанба соат 12:00. Агар асирлар бу ерда бўлмаса, жаҳаннам бошланади, деди Трамп.
Унинг сўзларига кўра, гаровга олинганларнинг барчаси босқичма-босқич эмас, балки бир вақтнинг ўзида озод қилиниши керак:
Битталаб, иккиталаб, учталаб, тўртталаб эмас. Ҳаммаси бирдан. Биз ҳаммасини қайтармоқчимиз. Мен фақат ўз номимдан гапиряпман. Исроил ўз билганича иш тутиши мумкин, дея таъкидлади у.
Агар ҲАМАС шартларни бажармаса, Трамп Исроилга ташкилот билан тузилган сулҳни бекор қилишни тавсия қилмоқда.
Трамп АҚШнинг аниқ қадамлари ҳақидаги саволларга ноаниқ жавоб бериб, ҲАМАС тез орада у нимани назарда тутаётганини билиб олишини айтди. У Қўшма Штатларнинг мазкур можарога ҳарбий аралашуви ҳақидаги саволга “нима бўлишини кўрамиз” дея жавоб берди.
Трамп озод қилинган асирларнинг ҳолатини ҳолокост қурбонлари билан таққослади:
Улар конслагер маҳбусларига ўхшарди. Улар жуда ёмон аҳволда, ҳолдан тойган эди. Буни қачонгача давом эттириш мумкинлигини билмайман.
Бир кун аввал ҲАМАС Исроилни ўт очишни тўхтатиш тўғрисидаги келишувни бузганликда, жумладан, Ғазодаги фаластинликларга ҳаво ҳужумлари уюштирганликда айблаб, гаровга олинганларни озод қилиш келаси шанба кунига қолдирилишини айтган эди.
Сўнгги уч ҳафта давомида биз душман томонидан келишув шартларининг доимий равишда бузилишини кузатдик, деб ёзди ҲАМАСнинг ҳарбий қаноти ҳисобланмиш “Иззаддин ал-Қассам бригадалари” гуруҳи вакили Абу Убайда ўзининг Telegram каналида.
Унинг қайд этишича, шу муносабат билан ҲАМАС 15 февраль куни озод қилиниши кутилаётган асирларни Исроилга қайтаришни кейинги огоҳлантиришгача кечиктиришга қарор қилган. У Исроил келишув қоидаларига риоя қилиши ва сўнгги ҳафталарда етказилган зарарни қоплаши кераклигини қўшимча қилди. Кейинги алмашинув шанба кунига белгиланган бўлиб, унда юзлаб фаластинлик маҳбуслар эвазига уч нафар исроиллик гаровга олинганларни озод қилиш режалаштирилган эди.
Исроилни келишувни мунтазам равишда бузишда айблаган Абу Убайданинг таъкидлашича, айбловлар “кўчирилган фаластинликларга Ғазо шимолига қайтишга рухсат беришни кечиктириш, ҳаво ҳужумлари ва секторнинг турли ҳудудларини ўққа тутиш, шунингдек, келишувларга мувофиқ гуманитар ёрдам етказиб беришга кўмаклашишга қодир эмасликни ўз ичига олади”.
Сулҳ шартларига кўра, ҲАМАС 33 нафар исроиллик асирни озод қилиши керак эди. Бунга жавобан Исроил 1900 нафар фаластинлик маҳбусни мамлакатига қайтариши керак.
Изоҳ (0)