AQSH prezidenti Donald Tramp kelajakda “Ukraina Rossiyaning bir qismiga aylanishi mumkinligi”ni aytdi. Bu haqda u FoxNews telekanaliga bergan intervyusida ma’lum qildi.
Trampdan Ukrainaga Amerika qurollari yetkazib berilishi haqida so‘raganda, u bu savolga javob berishdan bosh tortdi. Buning o‘rniga u Qo‘shma Shtatlar Ukrainaga boshqa davlatlarga qaraganda ancha ko‘p yordam ajratayotganini adolatsizlik deb baholadi.
Ular noyob metallar, neft va gaz, shuningdek boshqa resurslar nuqtayi nazaridan g‘oyat qimmatli yerga ega. Men pullarimiz xavfsiz bo‘lishini istayman, chunki biz yuzlab milliard dollar sarflayapmiz (Ukrainaga yordam berish uchun). Bilasizmi, ular (Ukraina va Rossiya) kelishuvga erishishi ham, erishmasliklari ham mumkin. Ukraina kelajakda Rossiyaning bir qismiga aylanishi yoki aylanmasligi mumkin. Lekin biz unga mablag‘ kiritganmiz va men uni qaytarib olmoqchiman, dedi Tramp.
AQSH prezidenti bu borada allaqachon Ukraina rahbariyati bilan gaplashganini va “ular rozi bo‘lganini” ta’kidladi.
AQSH allaqachon 300 milliard dollardan ortiq, ehtimol 350 milliard dollar sarmoya kiritgan. Yevropa esa — 100 milliard. Biz ikki baravar ko‘p mablag‘ ajratganmiz. Men ularga (Ukraina hukumatiga) buning evaziga nimadir, masalan, nodir metallar ko‘rinishidagi ekvivalentni xohlayotganimizni aytdim va ular aslida bunga rozi bo‘lishdi. Shunday ekan, hech bo‘lmaganda o‘zimizni ahmoqona his qilmaymiz, deb qo‘shimcha qildi Tramp.
Xavfsizlik kafolatlari evaziga Ukraina resurslaridan foydalanish
Trampning so‘zlariga ko‘ra, u Zelenskiy bilan Rossiya bilan bo‘lajak tinchlik shartnomasida xavfsizlik kafolatlari evaziga amerikalik investorlarga Ukrainadagi nodir metallar konlari va gaz konlariga kirish huquqini berish bo‘yicha 500 million dollarlik kelishuv tuzmoqchi.
G‘arbga Ukrainada foydali qazilmalarni qazib olish huquqini berish haqida Zelenskiy 2024-yil kuzida AQSH prezidentligiga o‘sha paytdagi nomzodlar Donald Tramp va Kamala Harrisga taqdim etgan “g‘alaba rejasi”da ham aytilgan.
3-fevral kuni Tramp bu variant haqida yana gapira boshladi, bu G‘arb siyosatchilari va ommaviy axborot vositalarida katta shov-shuvga sabab bo‘ldi. 7-fevral kuni Zelenskiy Reuters agentligiga bergan intervyusida AQSH Ukraina tabiiy resurslarini o‘zlashtirishda ustuvorlikka ega bo‘lishini, chunki “amerikaliklar hammadan ko‘proq yordam berganini” aytdi.
Izoh (0)