Isroil G‘azo sektorini shimoliy va janubiy qismlarga ajratgan Netsarim yo‘lagidan qo‘shinlarni olib chiqishni yakunladi. Bu haqda Euronews xabar berdi.
Isroil chegarasidan dengizgacha cho‘zilgan 6 km uzunlikdagi tor yo‘lak 2023-yil oxirida Isroil qurolli kuchlari tomonidan egallangan edi. Operatsiyaning yakunlanganini har ikki tomon manbalari tasdiqlagan. Isroil ommaviy axborot vositalari endi G‘azo sektorining shimoliy qismida askarlar qolmaganini ta’kidlamoqda.
Yo‘lakning g‘arbiy, dengiz bo‘yidagi qismidan erkin o‘tish ikki hafta oldin ochilgan bo‘lib, minglab odamlar janubdan shimoldagi tark etilgan uylariga qaytishga shoshildi. Qo‘shinlarni olib chiqish operatsiyasi 19-yanvardagi o‘t ochishni to‘xtatish kelishuvi doirasida amalga oshirildi. Bu kelishuv isroillik garovga olinganlarni Isroil qamoqxonalaridagi minglab falastinliklar bilan almashishni nazarda tutadi.
Biroq tomonlar hozircha sulhning ikkinchi va uchinchi bosqichlari shartlarini aniq belgilay olmayapti. Bu bosqichlarda almashinuv yakunlanishi va G‘azo sektorini qayta tiklash boshlanishi kerak edi.
Isroil va HAMAS o‘rtasida o‘t ochishni to‘xtatish kelishuvi va asirlar almashinuvi
Tomonlar o‘rtasida o‘t ochishni to‘xtatish va asirlarni almashish bo‘yicha kelishuv 19-yanvar kuni kuchga kirdi. Asirlar almashinuvining dastlabki to‘rt bosqichida Isroil qamoqxonalaridan 583 nafar falastinlik mahbus, shuningdek, G‘azo sektoridagi 13 nafar isroillik va 5 nafar taylik mahbus ozod qilindi.
8-fevral kuni Isroil armiyasi uch nafar isroillik asirning ozod etilishiga javoban 183 nafar falastinlik mahbusni qamoqdan chiqardi. Ulardan 18 nafari umrbod, 54 nafari esa uzoq muddatli qamoq jazosiga hukm qilingan. Yana 111 nafari 2023-yil 7-oktyabrda Isroil hujumlari boshlanganidan keyin G‘azo sektorida qo‘lga olingan falastinliklardir.
Umuman olganda, o‘t ochishni to‘xtatish to‘g‘risidagi kelishuvni amalga oshirish uch bosqichda o‘tkaziladi. 42 kun davom etadigan kelishuvning birinchi bosqichi doirasida 1900 dan ortiq falastinlik va 33 nafar isroillik ozod qilinishi kutilmoqda.
Izoh (0)