Isroil G‘azo aholisi uchun sektorning shimoliy qismiga yo‘lni ochdi, deb xabar bermoqda Reuters.
Ma’lum bo‘lishicha, bu HAMAS 2023-yil 7-oktyabrda qo‘lga olingan isroillik asir — Arbel Yagud va yana ikki kishini 31-yanvargacha ozod qilishga va’da berganidan so‘ng sodir bo‘lgan.
Ommaviy axborot vositalari va ijtimoiy tarmoqlarda minglab falastinliklar, asosan piyoda, G‘azo sektorining shimoliy qismiga yo‘l olayotgani aks ettirilgan lavhalar paydo bo‘ldi. Ularning ko‘pchiligi bir yildan ortiq vaqt oldin Isroil harbiy operatsiyasi tufayli o‘z uylarini tark etishga majbur bo‘lgan edi. Binolarning katta qismi, ayniqsa sektorning shimolida vayron bo‘lgani sababli, odamlar amalda xarobalarga qaytmoqda. Umuman olganda, sektorning 650 mingga yaqin aholisi shimolga qaytishi kutilmoqda.
Isroilning G‘azo aholisi uchun sektorning shimoliy qismiga yo‘l ochishi yanvar oyi o‘rtalarida vositachilar yordamida tuzilgan vaqtinchalik o‘t ochishni to‘xtatish va garovdagilarni ozod qilish to‘g‘risidagi kelishuvda nazarda tutilgan. Biroq 25-yanvar kuni HAMAS garovga olingan to‘rt nafar isroillik ayol harbiy xizmatchini ozod qilganidan so‘ng, Isroil guruh kelishuv shartlarini buzganini, avval tinch aholi vakili bo‘lgan Arbel Yagudni ozod qilmaganini e’lon qildi. Isroil G‘azo aholisining uning ozod etilishi tashkil qilinmaguncha sektor shimoliga o‘tishiga yo‘l qo‘ymasligini aytdi.
HAMAS vositachilarga Yagudning tirik ekanligini va keyingi shanba kuni ozod etilishini ma’lum qildi, ammo uning ozod qilinishini ertaroq muddatga ko‘chirdi. Xabar qilinishicha, u bilan birga harbiy xizmatchi Agam Berger va yana bir garovdagi shaxs ozod qilinadi.
Bu jadvaldan tashqari sodir bo‘ladi — 1 fevral kuni yana uchta garovdagi ozod qilinadi, deb xabar bermoqda The Times of Israel.
So‘nggi ma’lumotlarga ko‘ra, G‘azoda 2023-yil 7-oktyabr kuni HAMAS tomonidan o‘g‘irlab ketilgan 90 kishi qolmoqda. Ulardan bir necha o‘ntasi halok bo‘lgani taxmin qilinmoqda.
G‘azo sektorida o‘t ochishni to‘xtatish to‘g‘risidagi bitimning birinchi bosqichida HAMAS ozod qilishi kerak bo‘lgan garovdagilar ro‘yxatida 33 kishi bor edi. Hozirgi vaqtda ularning yettitasi ozod qilingan. Isroil bunga javoban jami ikki mingga yaqin falastinlikni o‘z qamoqxonalaridan ozod qilmoqda.
Isroil va HAMAS o‘rtasida o‘t ochishni to‘xtatish bitimi kuchga kirdi
Izoh (0)