Исроил Ғазо секторини шимолий ва жанубий қисмларга ажратган Нецарим йўлагидан қўшинларни олиб чиқишни якунлади. Бу ҳақда Euronews хабар берди.
Исроил чегарасидан денгизгача чўзилган 6 км узунликдаги тор йўлак 2023 йил охирида Исроил қуролли кучлари томонидан эгалланган эди. Операциянинг якунланганини ҳар икки томон манбалари тасдиқлаган. Исроил оммавий ахборот воситалари энди Ғазо секторининг шимолий қисмида аскарлар қолмаганини таъкидламоқда.
Йўлакнинг ғарбий, денгиз бўйидаги қисмидан эркин ўтиш икки ҳафта олдин очилган бўлиб, минглаб одамлар жанубдан шимолдаги тарк этилган уйларига қайтишга шошилди. Қўшинларни олиб чиқиш операцияси 19 январдаги ўт очишни тўхтатиш келишуви доирасида амалга оширилди. Бу келишув исроиллик гаровга олинганларни Исроил қамоқхоналаридаги минглаб фаластинликлар билан алмашишни назарда тутади.
Бироқ томонлар ҳозирча сулҳнинг иккинчи ва учинчи босқичлари шартларини аниқ белгилай олмаяпти. Бу босқичларда алмашинув якунланиши ва Ғазо секторини қайта тиклаш бошланиши керак эди.
Исроил ва ҲАМАС ўртасида ўт очишни тўхтатиш келишуви ва асирлар алмашинуви
Томонлар ўртасида ўт очишни тўхтатиш ва асирларни алмашиш бўйича келишув 19 январь куни кучга кирди. Асирлар алмашинувининг дастлабки тўрт босқичида Исроил қамоқхоналаридан 583 нафар фаластинлик маҳбус, шунингдек, Ғазо секторидаги 13 нафар исроиллик ва 5 нафар тайлик маҳбус озод қилинди.
8 февраль куни Исроил армияси уч нафар исроиллик асирнинг озод этилишига жавобан 183 нафар фаластинлик маҳбусни қамоқдан чиқарди. Улардан 18 нафари умрбод, 54 нафари эса узоқ муддатли қамоқ жазосига ҳукм қилинган. Яна 111 нафари 2023 йил 7 октябрда Исроил ҳужумлари бошланганидан кейин Ғазо секторида қўлга олинган фаластинликлардир.
Умуман олганда, ўт очишни тўхтатиш тўғрисидаги келишувни амалга ошириш уч босқичда ўтказилади. 42 кун давом этадиган келишувнинг биринчи босқичи доирасида 1900 дан ортиқ фаластинлик ва 33 нафар исроиллик озод қилиниши кутилмоқда.
Изоҳ (0)