Isroil va HAMAS o‘rtasida o‘t ochishni to‘xtatish to‘g‘risidagi bitim kuchga kirdi. Bu haqda Isroil bosh vaziri Binyamin Netanyaxuning kanselyariyasi xabar berdi.
HAMAS ozod qilinishi rejalashtirilgan garovga olinganlar ro‘yxatini berganidan so‘ng, Isroil o‘t ochishni to‘xtatish mahalliy vaqt bilan 11:15 da (Toshkent vaqti bilan 14:15) kuchga kirganini bildirdi. Kelishuv soat 8:30 da (Moskva vaqti bilan 11:30 da) kuchga kirishi kerak edi.
Biroq Isroil armiyasi “G‘azodagi terrorchi nishonlarga zarbalar berishni davom ettirayotgani”ni ma’lum qildi. Bunga HAMAS shartnoma shartlarini bajarmagani, jumladan, Isroilga ozod qilinadigan garovdagilar ro‘yxatini bermagani sabab bo‘ldi. Falastin harakati ro‘yxatni berishni kechikishini “texnik sabablar”, joylardagi xavfsizlik masalasi bilan izohladi.
Ro‘yxat taqdim etilgach, o‘t ochishni to‘xtatish kuchga kirdi. Isroil ham o‘z qo‘shinlarini qisman olib chiqishni boshladi. Isroil kuchlarining texnika kolonnalari Rafah va Bayt-Xanaan hududlarida harakatlanayotgani kuzatilgan.
Bir vaqtning o‘zida G‘azo sektoriga gumanitar yuklar kela boshladi. U yerga yonilg‘i va boshqa zarur tovarlar ortilgan 200 ta yuk mashinasi jo‘natilgani aytilmoqda.
Bitimning birinchi bosqichida HAMAS Isroil tomoniga 33 nafar garovga olinganlarni topshiradi, ularning aksariyati tirik deb taxmin qilinmoqda. Bular asosan ayollar, bolalar, keksalar, bemorlar va yaradorlardir. Bunga javoban Isroil yuzlab falastinlik mahbuslarni qamoqdan ozod qiladi.
Kelishuv shartlariga ko‘ra, Isroil armiyasi G‘azo sektori hududlarining aksariyat qismidan chiqib ketadi, faqatgina G‘azo sektori va Misr o‘rtasidagi Filadelfiya yo‘lagida, shuningdek, Falastin eksklavi va Isroil chegarasidagi maxsus bufer hududida harbiy mavjudligini saqlab qoladi. G‘azoning tinch aholisi o‘z uylariga, jumladan, janglar tufayli eng ko‘p zarar ko‘rgan shimoliy hududlarga ham qaytish imkoniyatiga ega bo‘ladi.
O‘n oltinchi kuni bitimning ikkinchi bosqichi bo‘yicha muzokaralar boshlanadi. Bu bosqichda Isroilga garovga olingan erkaklar va halok bo‘lgan asirlarning qolgan jasadlari topshirilishi mumkin. Baydenning ta’kidlashicha, kelishuvning uchinchi bosqichi G‘azoning urushdan keyingi tiklanishiga qaratiladi.
Izoh (0)