Isroil bosh vaziri Benyamin Netanyaxu G‘azo sektorining Rafah shahridagi qochqinlar lageriga uyushtirilgan hujumni “fojiali xato” deb atadi. Mazkur hujum oqibatida 45 kishi, jumladan, ayollar va bolalar halok bo‘ldi. Bu haqda BBC xabar berdi.
“Begunoh fuqarolarga zarar yetkazmaslik uchun barcha sa’y-harakatlarimizga qaramay, kecha tunda fojiali xatolik yuz berdi. Biz bu voqeani tekshirib, xulosa chiqaramiz, chunki siyosatimiz shunday”, — dedi Netanyaxu Isroil parlamentidagi chiqishida.
U “barcha maqsadlarga erishilmaguncha” urushni tugatish niyatida emasligini bildirdi. Isroilning zarbasi xalqaro, jumladan, gumanitar tashkilotlar, BMT va Yevropa Ittifoqi tomonidan qoralandi. Yevropa Ittifoqi diplomatiyasi rahbari Josep Borrell Isroilni BMT sudining Rafahga hujumni to‘xtatish buyrug‘iga amal qilishga chaqirdi.
“Bu operatsiyalar to‘xtatilishi kerak. Rafahda falastinlik tinch aholi uchun xavfsiz hududlar yo‘q. Men xalqaro huquqni to‘liq hurmat qilishga va zudlik bilan o‘t ochishni to‘xtatishga chaqiraman”, — dedi Fransiya prezidenti Emmanuel Makron.
Isroilning HAMAS bilan muzokaralarida vositachilik qilayotgan Qatar Tashqi ishlar vazirligi bu voqea muzokaralarni qayta tiklash va garovga olinganlarni ozod qilishga to‘sqinlik qilishi mumkinligidan ogohlantirdi.
“Odamlar tiriklayin yongan”: Isroilning Rafahdagi qochqinlar lageriga hujumi
- 27-mayga o‘tar kechasi Isroil armiyasi “aniq razvedka ma’lumotlari asosida” Rafahga hujum qilganini e’lon qildi. Zarbada HAMAS harbiy qanotining ikki vakili Yasin Rabia va Xolid Nagar halok bo‘ldi.
Biroq qochqinlar lageriga berilgan hujum oqibatida 45 kishi halok bo‘ldi, ularning ko‘pi ayollar va bolalardir.
Qurbonlarning aksariyati tanasi butunlay yonib ketgan, Isroil avvalroq mazkur lagerga ko‘chirilganlar xavfsiz hududda ekanini aytgandi. Isroil bosh vaziri Binyamin Netanyaxu ushbu bayonotni tekshirishga va’da berdi. BMT Isroil armiyasining harakatlarini qoraladi.
- 24-may kuni Xalqaro sud Isroilga G‘azo sektori Rafah shahridagi harbiy amaliyotini va Falastin aholisining yo‘q qilinishiga olib kelishi mumkin bo‘lgan boshqa harakatlarni to‘xtatishni buyurdi.
Bir oy ichida Isroil hukumati buyruqning bajarilishi haqida hisobot berishi kerak. Isroil Tashqi ishlar vazirligi va Xavfsizlik kengashi bayonotida ular operatsiyani to‘xtatish niyatida emasliklarini ta’kidladi.
Izoh (0)