Isroil tanklari 22-iyul kuni G‘azo sektori janubidagi Xon Yunis shahriga hujum qilishi oqibatida kamida 70 kishi halok bo‘ldi. Bu haqda Al Jazeera nashri xabar berdi.
Manbada aytilishicha, Isroil armiyasi hududga ogohlantirmasdan quruqlik va havo hujumlari uyushtirgan. Xon Yunisning ko‘plab hududlariga tanklar kiritilgan.
Isroil hukumati Xon Yunisda yangi operatsiya boshlanishini u yerda “terrorchilar” to‘plangani bilan izohlagan. Ularni zararsizlantirish uchun maxsus reja asosida harakat qilingani aytilgan.
Tanklar hujumi oqibatida jami 200 dan ortiq falastinlik jarohatlangan. Ularning ko‘pchiligi Nosir tibbiyot majmuasiga olib kelingan va birinchi tibbiy yordam ko‘rsatilgan.
G‘azo sog‘liqni saqlash vazirligi so‘nggi hujumda 70 kishi halok bo‘lganini tasdiqlagan. Shahar vayronalarini tozalash davomida jasadlar soni ortishi mumkin.
“Isroilning Xon Yunisga hujumida kun davomida 70 kishi shahid bo‘ldi, 200 dan ortiq kishi jarohat oldi. Halok bo‘lganlar orasida ayollar va bolalar bor”, deyiladi G‘azo Sog‘liqni saqlash vazirligi dushanba kuni bergan bayonotida.
Xabarda aytilishicha, Isroil tanklari Xon Yunisdan tashqari Bani Suhayla hududiga ham hujum qilgan. Ushbu hududdagi aholidan o‘z yashash joylarini tez fursatda tark etish talab qilingan.
Izoh (0)