Eron aerokosmik kuchlari harbiy mashg‘ulotlarda “G‘azo” nomli o‘ta og‘ir dronini namoyish qildi. Bu haqda The Economic Times xabar berdi.
Dronning qanotlari kengligi 22 metr va uchish og‘irligi 3100 kilogrammni tashkil etadi. Uning parvoz davomiyligi 35 soat bo‘lib, tezligi soatiga 350 kilometrgacha yetadi. G‘azo dronining yuk ko‘tarish qobiliyati kamida 500 kilogramm, u 12 tagacha bombani tashiy oladi. Uchish masofasi esa ming kilometr va operatsion radiusi 4000 kilometrni tashkil qiladi.
Harbiy mashqlar doirasida “G‘azo” droni sakkizta nishonni aniq va muvaffaqiyatli yo‘q qilishga erishgan. G‘azo sektori sharafiga nomlangan dron chegara operatsiyalari va milliy xavfsizlikni oshirish uchun mo‘ljallangan. General-mayor Husayn Salami va Amir Ali Hojizoda 26-yanvar kuni dronni ko‘zdan kechirib, uning tahdidlarga qarshi kurashda samaradorligini ta’kidladi.
19-yanvar kuni Eron o‘zining maxfiy yerosti bazasini namoyish qilgandi. Baza Fors ko‘rfazi qirg‘og‘ida yer ostida joylashgan bo‘lib, murakkab va uzun tunnellar tizimiga ega. Uning chuqurligi 500 metrga yetadi. Inshoot “yaxshi himoyalangan kemalar uchun yerosti shahri” deb ta’riflangan. Bazaning Fors ko‘rfaziga bir nechta chiqish yo‘llari mavjud bo‘lib, ular kemalarni tezda suvga tushirish imkonini beradi.
Bu baza Erondagi bir nechta shunga o‘xshash bazalardan biridir. U uzoq masofaga raketa uchirishga va uzoq masofadan jangovar harakatlarni olib borishga qodir kemalar uchun qurilgan edi.
Izoh (0)