Fransiya prezidenti Emmanuel Makron va Germaniya kansleri Olaf Shols Isroilni Rafahdagi operatsiyani to‘xtatishga chaqirdi. Bu haqda Bild xabar berdi.
Makron Rafahdagi vaziyatni “dahshatli” deb atadi, 27-mayga o‘tar kechasi Isroil armiyasi Rafahdagi falastinlik qochqinlar lageriga bergan zarbasi oqibatida 45 kishi halok bo‘lgandi.
“Fransiya HAMASning Isroilga hujumini boshidan qoralagan va Isroilning o‘zini himoya qilish huquqini qo‘llab-quvvatladi, lekin har qanday demokratiya kabi — xalqaro qonunlarga muvofiq”, — dedi Fransiya prezidenti.
Germaniya kansleri esa “Isroil o‘z harakatlarida xalqaro huquqni hurmat qilishi kerakligini ta’kidladi. U qochqinlar lagerining o‘qqa tutilishi oqibatida ko‘plab odamlar o‘lganini “fojiali voqea” deb atadi.
“Bu holat yana bir bor nega Germaniya boshqa ko‘plab davlatlar singari Rafahdagi keng ko‘lamli quruqlikdagi hujumga qarshilik ko‘rsatganini bildiradi. Chunki u yerda tinch aholi yetarlicha himoyalanmagan”, — dedi Shols.
“Odamlar tiriklayin yongan”: Isroilning Rafahdagi qochqinlar lageriga hujumi
- 27-mayga o‘tar kechasi Isroil armiyasi “aniq razvedka ma’lumotlari asosida” Rafahga hujum qilganini e’lon qildi. Zarbada HAMAS harbiy qanotining ikki vakili Yasin Rabia va Xolid Nagar halok bo‘ldi. Biroq qochqinlar lageriga berilgan zarba oqibatida 45 kishi halok bo‘ldi, ularning ko‘pi ayollar va bolalardir.
Qurbonlarning aksariyati tanasi butunlay yonib ketgan, Isroil avvalroq mazkur lagerga ko‘chirilganlar xavfsiz hududda ekanini aytgandi. Isroil bosh vaziri Binyamin Netanyaxu ushbu bayonotni tekshirishga va’da berdi. BMT Isroil armiyasining harakatlarini qoraladi.
- 24-may kuni Xalqaro sud Isroilga G‘azo sektori Rafah shahridagi harbiy amaliyotini va Falastin aholisining yo‘q qilinishiga olib kelishi mumkin bo‘lgan boshqa harakatlarni to‘xtatishni buyurdi.
Bir oy ichida Isroil hukumati buyruqning bajarilishi haqida hisobot berishi kerak. Isroil Tashqi ishlar vazirligi va Xavfsizlik kengashi bayonotida ular operatsiyani to‘xtatish niyatida emasliklarini ta’kidladi.
Izoh (0)