Suriyaning yangi hukumati Rossiyadan mamlakat sobiq prezidenti Bashar Asadni mamlakatga qaytarishni so‘radi. Bu haqda Reuters agentligi muhokamalar jarayoni bilan tanish bo‘lgan manbaga tayanib xabar berdi.
Talabni Suriyaning “Hay’at Tahrir ash-Shom” (HTSH) guruhining rahbari Abu Muhammad al-Juloni — Ahmad ash-Sharaa ilgari surgan.
Suriyaning “Sana” agentligi yangi ma’muriyat, shuningdek, Rossiyadan “ishonchni tiklash uchun” kompensatsiya talab qilgani haqida yozgan edi.
Muloqot davomida kompensatsiya, rekonstruksiya va qayta tiklash kabi aniq chora-tadbirlar orqali Suriya xalqi ishonchini qozonishda Rossiyaning roli ta’kidlandi, deyiladi xabarda.
Shuningdek, Suriyaning yangi rahbariyati Rossiya bilan munosabatlarni tiklash jarayonida “o‘tmishdagi xatolarni inobatga olish, Suriya xalqining xohish-irodasini hurmat qilish va uning manfaatlariga xizmat qilish” zarurligini ta’kidlagan.
Kreml kompensatsiya talablari haqidagi xabarlarga izoh bermagan.
Men buni hech qanday izohsiz qoldiraman. Biz Suriya hukumati bilan muloqotni davom ettiramiz, dedi Rossiya prezidenti matbuot kotibi Dmitriy Peskov.
Uning so‘zlariga ko‘ra, bu “muhim aloqalar” hisoblanadi.
Rossiya delegatsiyasi 28-yanvar kuni Suriyaga tashrif buyurdi. Delegatsiya tarkibiga tashqi ishlar vaziri o‘rinbosari Mixail Bogdanov va prezidentning Suriya bo‘yicha maxsus vakili Aleksandr Lavrentyev kirgan.
Uchrashuv davomida tomonlar Suriyadagi Rossiya harbiy bazalariga nisbatan hozircha hech narsa o‘zgarmagan, degan xulosaga keldi. Bu masala qo‘shimcha muzokaralarni talab qiladi. Biz hamkorligimizning har bir yo‘nalishi bo‘yicha yanada chuqur maslahatlashuvlarni davom ettirishga kelishib oldik, deya xabar berdi Bogdanov Damashqqa tashrifidan so‘ng.
O‘z navbatida, Rossiya Tashqi ishlar vazirligi Suriyaning tiklanishida yordam berishga tayyorligini ma’lum qildi.
Rossiya tomoni Suriya Arab Respublikasi birligi, hududiy yaxlitligi va suverenitetini doimiy qo‘llab-quvvatlashini, shuningdek, Suriya xalqiga inqirozdan keyingi tiklanishda zarur yordam ko‘rsatishga tayyorligini tasdiqladi, deydi Rossiya TIV.
Suriyadagi vaziyat
Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.
Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.
Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan.
Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi. 10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan televideniye murojaatida bu lavozimni kamida 2025-yil 1-martgacha egallab turishini ma’lum qildi.
Izoh (0)