Turkiya prezidenti Rajab Toyyib Erdo‘g‘on yaqin kelajakda Suriya shimolida faoliyat yuritayotgan, Anqara tomonidan terrorchi deb e’tirof etilgan Kurdiston ishchi partiyasi (KIP) jangarilarini qat’iy yo‘q qilish istagini bildirdi.
“Biz KIP-XMK (KIPning Suriya tarmog‘i — “Xalq mudofaa kuchlari”) terrorchilik tashkilotiga hech qanday toqat qilmaymiz. Agar Suriya hududining uchdan bir qismini bosib olgan XMK guruh rahbari Abdulloh O‘jalonning qurolni tashlash haqidagi chaqirig‘iga quloq solmasa, yaqin orada bu masalani tubdan hal qilish uchun qat’iy choralar ko‘ramiz”, dedi Erdo‘g‘on.
Erdo‘g‘onning Turkiyadagi hukmron koalitsiyadagi hamkori, Millatchi harakat partiyasi (MHP) yetakchisi Davlat Bahchali avvalroq kurd masalasini hal qilish bo‘yicha taklif bilan chiqib, umrbod qamoq jazosini o‘tayotgan KIP rahbari O‘jalonni o‘z tarafdorlariga taslim bo‘lish tashabbusi bilan chiqishga da’vat etgandi.
Kurd tarafdori DEM partiyasi vakillari 2024-yil oxirida Marmara dengizidagi Imrali orolidagi qamoqxonada O‘jalan bilan muzokara o‘tkazgan edi. Turkiya hukumatini qo‘llab-quvvatlovchi OAVlarning xabar berishicha, u fevral oyining o‘rtalarigacha KIPga Turkiyaga qarshi qurolli qarshilikni to‘xtatish uchun murojaat qilishi mumkin.
Turkiya yetakchisi avval ham xalqaro o‘yinchilarni Suriyadan “qo‘llarini tortishga” chaqirib, Anqara mamlakatda terroristik guruhlarning faoliyatiga chek qo‘yish uchun yetarli salohiyat va imkoniyatlarga ega ekanini aytgan edi.
Prezident KIP bilan bog‘liq terrorchi guruhlarni qurolsizlanishga chaqirgan. U, shuningdek, agar ular buni rad etsa, Anqara terrorizmni yo‘q qilish yo‘lini topishiga ishontirgan.
Hurriyet nashri ham Anqara, agar kurd terrorchilari qurollarini tashlamasa, Suriya bilan birgalikdagi operatsiyani boshlashi mumkinligi haqida xabar bergan.
Turkiya tashqi ishlar vaziri Hakan Fidan agar hukumat tomonidan qo‘yilgan shartlar bajarilmasa, mamlakat Suriya hududida faoliyat ko‘rsatayotgan kurd qurolli guruhlariga qarshi harbiy operatsiya o‘tkazishga majbur bo‘lishi haqida ta’kidlagan.
“Agar Kurdiston ishchilar partiyasi (KIP) terrorchilik tashkilotiga nisbatan kutilayotgan ishlar bajarilmasa, zarur choralar ko‘riladi. Zarur chora esa harbiy operatsiyadir”, degan vazir.
Izoh (0)