Eron Suriyada katta mag‘lubiyatga uchragan, ammo shunday bo‘lsa-da, mamlakatda o‘z faoliyatini davom ettirishga urinadi. Bu haqda Islom inqilobi qo‘riqchilari korpusining (IIQK) brigada generali Behruz Esbatiy ma’lum qildi.

NYT nashri ma’lumotlariga ko‘ra, general o‘tgan hafta Tehrondagi masjidda so‘zga chiqqan va uning nutqi Eron rahbariyatining bayonotlariga keskin zid bo‘lgan. Eron rasmiylari haftalab Suriyadagi strategik yo‘qotishlar ko‘lamini kamaytirib ko‘rsatishga uringan.

Esbatiy Rossiyani “rus samolyotlari Suriya qo‘zg‘olonchilarini bombardimon qilayotgani” haqidagi da’volari bilan Eronni chalg‘itganlikda ayblab, aslida ular ochiq maydonlarga bomba tashlaganini ta’kidladi.

Uning so‘zlariga ko‘ra, 2024-yilda Isroil Suriyadagi Eron nishonlariga zarba berganida, Rossiya “radarlarni o‘chirib, amalda ushbu hujumlarga ko‘maklashgan”.

IIQK generali, shuningdek, Eronning Suriya prezidenti Bashar Asad bilan munosabatlari u iste’foga chiqishidan bir necha oy oldin keskinlashganini aytgan.

“Men Suriyaning yo‘qotilishini faxrlanadigan narsa deb hisoblamayman. Biz mag‘lubiyatga uchradik va mag‘lubiyat juda og‘ir bo‘ldi”, deydi Esbatiy.

Suriyadagi vaziyat

Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.

Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.

Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan. Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.

10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan televideniye murojaatida bu lavozimni kamida 2025-yil 1-martgacha egallab turishini ma’lum qildi.