Suriyada yangi hokimiyatni qo‘llab-quvvatlayotgan jangarilar uch kun ichida kamida 35 kishini qatl etdi.

Suriya Inson huquqlari kuzatuv markazining xabar berishicha, qatl etilganlarning aksariyati ag‘darilgan Bashar Asad hukumatining sobiq amaldorlari bo‘lgan. Yangi hukmdorlar nazoratidagi mahalliy qurolli guruhlarning o‘nlab a’zolari Xoms mintaqasidagi “xavfsizlik operatsiyalari”da ishtirok etganligi sababli hibsga olindi.

Jangovar bo‘linmalar Asad mansub bo‘lgan alaviy ozchilik a’zolariga qarshi “qasos harakatlari”ni amalga oshirdi. Ular “tartibsizlik holati, qurollarning tarqalishi va yangi hukmdorlar bilan aloqalari”dan foydalanib, “eski hisoblarni tozaladi”, deyiladi markaz bayonotida.

Avvalroq SANA rasmiy axborot agentligi yangi hukumat “jinoiy guruh” a’zolarini xavfsizlik operatsiyasi paytida o‘zlarini xavfsizlik kuchlari xodimlari sifatida ko‘rsatib, aniqlanmagan “qonunbuzarliklar” sodir etganlikda ayblaganini xabar qilgan edi.

Inson huquqlari kuzatuv markazi o‘zboshimchalik bilan ommaviy hibsga olishlar, shafqatsiz qiynoqlar, diniy ramzlarga hujumlar, tinch aholi jasadlarini haqoratlash hamda o‘zboshimchalik va shafqatsiz qatl etishlar haqida ma’lumot berdi.

Bu jinoyatlar “misli ko‘rilmagan shafqatsizlik va zo‘ravonlik” bilan sodir etilgan, deyiladi xabarda.

Civil Peace Group tashkiloti ma’lumotlariga ko‘ra, Xoms mintaqasidagi bir nechta qishloq aholisi operatsiya qurboniga aylangan. Tashkilot “asossiz qonunbuzarliklar”ni, jumladan qurolsiz erkaklarni o‘ldirishni qoralagan.

Suriyada Asad rejimining qulashi

Noyabr oyi oxirida qurolli isyonchilar Suriya shimoliy qismiga yurishni boshladi. Ular Idlib viloyatini, mamlakatdagi aholi soni bo‘yicha ikkinchi o‘rinda turuvchi Halab shahrini, Xama va Xoms viloyatlari hududlarining bir qismini o‘z nazoratiga oldi. Shundan so‘ng Damashqqa kirdi. Prezident Bashar Asad oilasi bilan mamlakatni tark etdi.

Rossiya Tashqi ishlar vazirligi Bashar Asad isyonchilar bilan kelishuvga erishib, iste’foga chiqishga rozi bo‘lgani, shundan keyin Suriyani tark etgani haqida ma’lumot berdi. Isyonchilar Asadni qo‘lga olishda yordam beradigan ma’lumot uchun 10 million dollar va’da qilgan.

Siyosatchi mamlakatni tark etganidan keyin isyonchilar Asad qarorgohiga bostirib kirgan, odamlar buyumlarni talon-toroj qilgan. Qarorgohdagi garajda BMW, Audi, Ferrari, Lamborghini Diablo kabi 50 ga yaqin hashamatli va qimmatbaho avtomobillar aniqlangan. Kechroq Kremldagi manbalar Suriyadan qochgan prezident oilasi bilan Moskvaga kelgani, Putin ularga boshpana berganini ma’lum qildi.

10-dekabr kuni Idlib shahrida isyonchilarga rahbarlik qilgan Muhammad al-Bashir o‘zini Suriyaning o‘tish davri hukumati rahbari etib tayinladi. U fuqarolarga qarata qilgan televideniye murojaatida bu lavozimni kamida 2025-yil 1-martgacha egallab turishini ma’lum qildi.