Rossiyaning samolyotlari Suriyadagi isyonchilarga hujum qilish o‘rniga bo‘sh sahroni bombardimon qilgan. Eronning yuqori martabali generali Rossiyani Tehronga yolg‘on gapirganlikda aybladi. Bu haqda Business Insider xabar berdi.
General-mayor Behruz Esbatiy Tehrondagi masjidda so‘zlagan nutqida Bashar Asad hukumatining qulashida Moskvani qisman aybladi.
“Biz mag‘lubiyatga uchradik va bu juda og‘ir. Biz juda katta zarba oldik va bu qiyin ahvolga solib qo‘ydi”, dedi Esbati Asadning qulashi haqida.
Generalga ko‘ra, Rossiya Asadni quvib chiqarishda boshchilik qilgan isyonchi guruh — “Hay’at Tahrir al-Shom” shtab-kvartirasiga bomba yog‘dirayotgani haqida Eronni xabardor qilgan.
“Ammo Moskva qo‘shinlari buning o‘rniga sahrolarni nishonga olgan”, dedi Esbati.
Bundan tashqari, generalning ta’kidlashicha, 2024-yili Isroil Suriyadagi Eron bilan bog‘liq obyektlarga zarba berganida, Rossiya ba’zi radarlarni o‘chirib qo‘ygan va “aslida bu hujumlarni qo‘llab-quvvatlagan”.
General Asadning ag‘darilishida asosan ichki korrupsiyani ayblab, Suriyaning yuqori martabali amaldorlari va generallari orasida poraxo‘rlik keng tarqalganini aytdi.
U Damashq va Tehron o‘rtasidagi munosabatlar so‘nggi bir yil ichida keskinlashganini ta’kidladi. Bunga Asad Eronning Suriya orqali Isroilga hujumlar berish iltimosini rad etgani sabab bo‘lgan.
Esbati Suriyada Eronning harbiy operatsiyalariga rahbarlik qilgan va o‘z harakatlarini Suriya harbiy boshliqlari va Rossiya generallari bilan muvofiqlashtirgan. Rossiya hukumati Esbatining ayblovlariga hozircha izoh bermadi.
Izoh (0)