13 yildan so‘ng Suriyaga birinchi parvozini amalga oshirgan Turkish Airlines (THY) samolyoti Damashq xalqaro aeroportiga qo‘ndi, deb xabar bermoqda Anadolu.
Turkish Airlines aviakompaniyasining Boeing 777 samolyoti Istanbul aeroportidan yo‘lga chiqdi. Damashq xalqaro aeroporti esa Suriyadagi Asad rejimi ag‘darilganidan so‘ng o‘z faoliyatini qayta boshladi.
“Suriya havo yo‘llari” samolyoti 18-dekabr kuni Damashq xalqaro aeroportidan Halabga ichki aviaqatnovda ilk parvozini amalga oshirdi.
Joriy yilning 7-yanvar kuni Damashq aeroporti xalqaro reyslarni qayta tiklagan edi.
THY’ning Suriyaga oxirgi parvozi 2012-yil 31-martda amalga oshirilgan edi.
Parvozlar haftasiga 3 marta amalga oshirilishi rejalashtirilmoqda. THY saytidan olingan ma’lumotlarga ko‘ra, Istanbul aeroportidan Damashq xalqaro aeroportiga to‘g‘ridan-to‘g‘ri reyslar haftasiga uch marta: seshanba, payshanba va yakshanba kunlari soat 09:00 da amalga oshiriladi. Damashq aeroportidan Istanbul aeroportiga qaytish reyslari ham xuddi shu kunlari soat 13:00 ga rejalashtirilgan.
Suriyaning yangi hukumati avvalroq Turkiya tovarlari importiga bojlarni 300-500 foizga oshirgan edi.
Buning oqibatida Turkiyadan arab respublikasiga eksport deyarli to‘xtadi, bu esa sohada faoliyat yuritayotgan kompaniyalar uchun jiddiy muammolarni keltirib chiqardi. Shuningdek, chegarada turnaqator navbatlarga olib keldi.
Janubi-Sharqiy Anadolu eksportchilari uyushmasi raisi Jalol Kadogluga ko‘ra, ilgari Suriyaga oylik eksport hajmi taxminan 30 million dollarni tashkil etgan. Ammo hozirda bu butunlay to‘xtab qolgan.
“Vaziyat, ayniqsa, Suriyaga tovar yetkazib berishga ixtisoslashgan kompaniyalar uchun og‘riqli, chunki ular o‘z mahsulotlarini qisqa vaqt ichida boshqa bozorlarga yo‘naltira olmaydi”, dedi u.
Turkiyalik sharhlovchilarning yozishicha, muammo allaqachon siyosiy kun tartibiga qo‘yilgan. Turkiya tashqi ishlar vaziri Hoqon Fidan Suriya muvaqqat hukumati vakillari bilan uchrashuvda boj masalasini muhokama qilishi kutilgandi.
Endi ko‘plab eksportchilar savdoni tiklash va zararni minimallashtirish uchun muammoning tezda hal qilinishini kutmoqda. Bu Turkiya va Suriya o‘rtasida iqtisodiy munosabatlardagi qiyinchiliklarni ko‘rsatmoqda.
Avvalroq Turkiya prezidenti Rajab Toyyib Erdo‘g‘on mamlakatining Suriya inqiroziga aralashuvi nafaqat o‘zini oqlagan, balki zaruriy qadam ekanini ta’kidlagandi.
Izoh (0)