Kiyev shahri meri Vitaliy Klichko Vladimir Zelenskiyning atrofidagilar Ukraina poytaxtidagi hokimiyat muvozanatini izdan chiqarishga va mahalliy o‘zini o‘zi boshqarish tizimini yo‘q qilishga urinayotganini ma’lum qildi.
Ukraina prezidentiga murojaat qilaman. Siz oliy bosh qo‘mondon sifatida urush va Ukrainani himoya qilishga e’tibor qaratayotgan bir paytda, atrofingizdagi odamlar siyosiy fitnalar bilan band. Bu jarayonlar esa tobora xavfli tus olmoqda. Kiyevda hokimiyat muvozanatini buzishga va mahalliy o‘zini o‘zi boshqarish tizimini yo‘q qilishga urinish kuzatilmoqda, deb yozdi Klichko o‘zining Telegram kanalida.
Uning aytishicha, Kiyev shahar harbiy ma’muriyatining yangi rahbari Timur Tkachenko shikastlangan uylar va infratuzilmani tiklash ishlarini to‘xtatib qo‘ymoqda. Bu esa shahar boshqaruvini izdan chiqarmoqda va poytaxtning hayot ta’minotiga tahdid solmoqda.
Shu bilan birga, u qonunni buzgan holda shahar meri, shahar kengashi va Kiyev shahar ma’muriyatining vakolatlarini o‘ziga olishga urinmoqda. Men prezidentdan, konstitutsiya kafolatchisi sifatida, demokratiyaning asosi bo‘lgan mahalliy o‘zini o‘zi boshqaruv tizimining barbod bo‘lishiga yo‘l qo‘ymasligini so‘rayman, deya qo‘shimcha qildi Klichko.
2024-yil oktyabr oyida Klichko huquqni muhofaza qiluvchi organlarning ko‘plab tezkor harakatlari mahalliy hokimiyat organlari va kommunal korxonalar ishini to‘sib qo‘yayotganini ma’lum qilgan.
Klichko 2023-yil oxirida Zelenskiyning harakatlari oqibatida Ukrainada mustaqil hokimiyat institutlari deyarli qolmaganini, mamlakat hamma narsa bir odamning kayfiyatiga bog‘liq bo‘lgan avtoritarizmga qarab harakatlanayotganini aytgan edi.
Izoh (0)