24-noyabr kuni ertalabki holatga ko‘ra, Kiyevning 70 foiz qismi elektr energiyasiz qolmoqda. Bu haqda shahar meri Vitaliy Klichko ma’lum qildi.
Klichkoning so‘zlariga ko‘ra, rasmiylar chiroqni “imkon qadar tezroq” qaytarish uchun hamma ishni qilmoqda, biroq buning aniq muddati Ukraina energetika tizimida muvozanatning qayta tiklanishga bog‘liq bo‘ladi.
Klichko, shuningdek, Kiyevning Dnepr chap qirg‘og‘idagi qismida suv ta’minoti tiklanganini aytdi; o‘ng qirg‘oqda ham bu boradagi ishlari davom etmoqda.
23-noyabr kuni Rossiya Ukrainaning muhim infratuzilmasini ommaviy ravishda o‘qqa tutdi. Oqibatda Kiyev suv va elektr ta’minotisiz qoldi. Ukrainaning barcha hududlarida favqulodda elektrni o‘chirish sodir bo‘ldi; Kiyev, Odessa va Chernigov viloyatlari energiyadan butunlay uzildi.
Vladimir Zelenskiy Birlashgan Millatlar Tashkiloti Xavfsizlik kengashidan shoshilinch yig‘ilish o‘tkazishni so‘radi. Unda onlayn qatnashgan Ukraina rahbari Rossiyaning energetika terrorini to‘xtatishga chaqirdi va BMT ekspertlarini Ukrainaning muhim infratuzilma obyektlarini kelib tekshirishga taklif qildi.
Izoh (0)