Kiyevda elektr uzilishlari bahorgacha davom etishi mumkin. Bu haqda shahar meri Vitaliy Klichko “RBK-Ukraina”ga bergan intervyusida ma’lum qildi.
“Biz hamma narsani imkon qadar tezroq tiklashga, kutilmagan hodisalar bo‘lmasligi uchun aniq jadvallarga o‘tishga va shundan keyin uzluksiz elektr ta’minotiga o‘tishga harakat qilyapmiz. Ammo uzilishlar bahorgacha davom etishi mumkinligiga tayyor turishimiz kerak”, — dedi Klichko.
Shahar meri, shuningdek, Kiyev aholisi shahar chetiga ko‘chirilishi ehtimoli haqidagi gaplarga ham izoh berdi. U aholini oziq-ovqat va suv zaxirasini to‘plashga chaqirdi.
Biz turli ssenariylarga, jumladan, yomonlariga ham tayyor bo‘lishimiz kerak. To‘liq evakuatsiya bo‘lmaydi, balki qisman amalga oshirilar, lekin uni evakuatsiya deb bo‘lmaydi. Buni muayyan toifadagi odamlarning vaqtinchalik shahar atrofiga ko‘chirilishi deyish mumkin.Rossiya muntazam ravishda Ukrainaning energetika infratuzilmasiga qarshi ommaviy zarbalar bermoqda. Oqibatda Ukraina shaharlari yorug‘lik, issiqlik va suvsiz qolmoqda.Kiyevning har bir fuqarosidan turli ssenariylarni hisobga olishni va ularga tayyor turishni so‘rayman. Iltimos, uyda texnika va ichimlik suvi, elektr energiyasisiz pishirish yoki iste’mol qilish mumkin bo‘lgan oziq-ovqat mahsulotlari, issiq kiyimlar tayyorlab qo‘ying, noutbuk va poverbanklarni zaryadga to‘ldiring, telefoningizga oflayn kartalar yuklab oling.
Mabodo yomon ssenariy yuz bergan taqdirda, hamma shahar chetidagi suv, pechkasi bor uyiga yoki do‘stlarinikiga bora olsa yaxshi bo‘lardi. Ammo biz eng yomon holat sodir bo‘lmasligi uchun qo‘limizdan kelganini qilyapmiz, — dedi Kiyev meri.
Ukraina hukumati “buzilmas punktlar” — issiqlik va elektr energiyasi bilan uzluksiz ta’minlanadigan joylarni tashkil qildi. 25-noyabr kuni Ukraina prezidenti Vladimir Zelenskiy bunday punktlar yomon joylashtirilgani uchun Kiyev rasmiylarini tanqid qildi.
Izoh (0)