Ukraina prezidenti Vladimir Zelenskiy Rossiya qo‘shinlari Ukrainaning bosib olingan hududlarini tark etguniga qadar o‘t ochishni to‘xtatish talablarini yana bir bor rad etdi.
Shu bilan birga, Zelenskiy urushni adolatli yakunlashning uchta omilini — sabr-toqat, xalqaro hamjamiyat tomonidan qo‘llab-quvvatlash va Moskvaga diplomatik bosim o‘tkazishni aytib o‘tgan.
Agar AQSH va Yevropa davlatlari Rossiyaning Ukrainaga qarshi harbiy tajovuzi borasidagi siyosatda birdam bo‘lsa, bu qo‘shimcha bosim o‘tkazadi va Moskvaga hech qanday imkoniyat yo‘qligini ko‘rsatadi, deya tushuntirgan u.
Zelenskiy boshqa davlatlar bilan Ukrainaning hududiy yaxlitligi va boshqa mavzularda batafsil muhokamalarni boshlash rejalarini maʼlum qilgan. Uning so‘zlariga ko‘ra, noyabr oxirigacha tinchlikka erishish uchun harakat rejasi tayyorlanishi kutilmoqda.
Ukraina prezidenti, shuningdek, Kiyev rasmiylari AQSH prezidentligiga nomzod Donald Tramp va uning ehtimoliy raqibi, vitse-prezident Kamala Harrisning saylovoldi shtab-kvartirasi bilan aloqa o‘rnatganini aytgan.
Urush boshlanganidan beri Kiyev Moskva bilan tinchlik muzokaralari faqat rus qo‘shinlari mamlakat hududidan uning xalqaro tan olingan chegaralari doirasida olib chiqib ketilgandan keyingina mumkin bo‘lishini bir necha bor ta’kidlagan.
Kiyev meri Vitaliy Klichko avvalroq hududiy murosaga kelish imkoniyatini tan olgan, biroq Ukraina rasmiylari bu bayonotga izoh bermagan.
Izoh (0)