Kiyev meri Vitaliy Klichko urush boshlanganidan beri Rossiya harbiylari Ukraina shaharlarining 30 nafar merini o‘g‘irlab ketganini aytdi. Bu haqda u Spiegel nashriga ma’lum qildi.
Klichkoning so‘zlariga ko‘ra, yettita shaharning rahbari hali ham bedarak yo‘qolgan. “Merlar hamma joyda nishonga aylangan edi. Ruslar merlarni hibsga olishga urinib, ularni hamkorlikka majburlash uchun turli usullardan foydalandi”, — deydi Kiyev meri.
Ukraina hukumati merlarga ularning boshqaruvidagi hudud Rossiya harbiylari tomonidan egallab olingan taqdirda shaharni tark etishi kerakmi yoki yo‘qmi, aniq javob bermagan. Klichko ukrainaliklarning o‘zlari shunday qaror qabul qilishga majbur bo‘lganini aytmoqda.
“Vaziyat og‘ir edi: agar shaharda qolsangiz, siz xoinsiz. Hukumatdan bu bo‘yicha ko‘rsatma berishni bir necha bor so‘raganmiz. Lekin aniq javob olmadik”, — deya xulosa qildi Klichko.
Avvalroq, Klichko Kiyevda elektr uzilishlari bahorgacha davom etishi mumkinligini aytgandi. U aholini oziq-ovqat va suv zaxirasini to‘plashga chaqirgandi.
“Mabodo yomon ssenariy yuz bergan taqdirda, hamma shahar chetidagi suv, pechkasi bor uyiga yoki do‘stlarinikiga bora olsa yaxshi bo‘lardi. Ammo biz eng yomon holat sodir bo‘lmasligi uchun qo‘limizdan kelganini qilyapmiz”, — degan Kiyev meri.
Rossiya muntazam ravishda Ukrainaning energetika infratuzilmasiga qarshi ommaviy zarbalar bermoqda. Oqibatda Ukraina shaharlari yorug‘lik, issiqlik va suvsiz qolmoqda. Ukraina hukumati “buzilmas punktlar” — issiqlik va elektr energiyasi bilan uzluksiz ta’minlanadigan joylarni tashkil qilgan. 25-noyabr kuni Ukraina prezidenti Vladimir Zelenskiy bunday punktlar yomon joylashtirilgani uchun Kiyev rasmiylarini tanqid qilgandi.
Izoh (0)