2-yanvarga o‘tar kechasi Rossiya qo‘shinlari Ukrainaga keng ko‘lamli hujum uyushtirdi.
Tunda Rossiya harbiylari Shahed-136/131 rusumli 35 ta hujumchi dron uchirdi, deb xabar bermoqda Ukraina Qurolli kuchlari Harbiy havo kuchlari. UQK ma’lumotlariga ko‘ra, barcha dronlar urib tushirilgan.
Rossiya qo‘shinlari shuningdek, bir nechta raketa hujumlarini amalga oshirdi: Tu-95MS bombardimonchi samolyotlari va MiG-31K qiruvchilarining (Kinjal raketalarini tashiydi) hujumi haqida xabar berilgan. Ukraina harbiy-havo kuchlari Rossiya qo‘shinlari Kiyev yo‘nalishi bo‘ylab “Kinjal” raketalarni uchirgani haqida ma’lum qildi. Jami Rossiya Ukrainaga 11 ga yaqin “Kinjal” raketalarini uchirdi, dedi Ukraina Ombudsmani Dmitriy Lubinets. Butun Ukraina bo‘ylab havo hujumi haqida ogohlantirish eʼlon qilindi.
Kiyev
Kiyevdagi Desnyanskiy tumanida, ochiq maydonga uchuvchisiz uchoq parchasi kelib tushdi, dedi shahar meri Vitaliy Klichko. Uning aniqlik kiritishicha, hududdagi supermarketda yong‘in sodir bo‘lgan. Solomenskiy tumanida raketa hujumi oqibatida ikkita ko‘p qavatli turar joy binosida yong‘in sodir bo‘ldi. Shahar ma’muriyati rahbari Sergey Popkoning so‘zlariga ko‘ra, Pecherskiy tumanida to‘qqiz qavatli uy tomi va yana bir turar joy binosiga raketa qoldiqlari tushgan. Goloseyevskiy tumanida vayronalar parkdagi ochiq maydonga, Obolonskiy tumanida — noturar joyga qulagan.
Podolsk viloyatida gaz quvuri, fuqarolik infratuzilmasi obyekti va suv ta’minoti tizimi shikastlangan. Shuningdek, ikki ming kvadrat metr maydonni egallagan ombor binosida, bozor hududida va tura joy binosida yong‘inlar sodir bo‘lgan. Obolonskiy tumanida raketa parchalari ombor hududiga tushdi, dedi Popko.
Klichkoning aytishicha, Svyatoshinskiy tumanida ijtimoiy infratuzilma obyektiga zarba berilgan. Ukraina OAV Tesla avtosalonida yong‘in sodir bo‘lganini xabar qilmoqda, biroq bu haqda hech qanday tasdiq yo‘q.
Ukraina rasmiylarining so‘nggi maʼlumotlariga ko‘ra, Kiyevga qilingan hujum oqibatida 20 kishi jabrlangan. Kiyevning Solomenskiy tumanida zarbalar ostida qolgan uydan 17 kishi qutqarib olindi. Jabrlanganlarning aksariyati kasalxonaga yotqizilgan. Kiyevning ayrim hududlarida suv ta’minotida vaqtinchalik muammolar yuzaga keldi, dedi Klichko. Shevchenkovskiy, Svyatoshinskiy, Goloseyevskiy va Obolonskiy tumanlarida elektr energiyasi qisman yo‘qolgan. Kiyev viloyatining Buchanskiy va Vishgorod tumanlarida ham elektr yo‘q.
Xarkov
Rossiya qo‘shinlari Xarkov markaziga 2-yanvar kuni taxminan soat 7:30 da zarba berdi, dedi Xarkov viloyati harbiy ma’muriyati rahbari Oleg Sinegubov. Uning so‘zlariga ko‘ra, xususan, hujum Shevchenko tumanida bo‘lib o‘tgan. Politsiya maʼlumotlariga ko‘ra, to‘rtta zarba qayd etilgan. Raketalardan biri turar joy binosi yaqiniga qulagan, 91 yoshli mahalliy aholi u yerda kasalxonaga yotqizilgan.
Hukumat ma’lumotlariga ko‘ra, ko‘p qavatli uylar, xo‘jalik inshootlari va boshqa fuqarolik infratuzilmalariga zarar yetgan, yong‘inlar sodir bo‘lgan. Shuningdek, bir nechta mashina yonib ketgan.
So‘nggi maʼlumotlarga ko‘ra, Xarkovdagi raketa hujumi oqibatida bir kishi halok bo‘lgan, 41 kishi jarohatlangan.
Ukrainaning qolgan qismi
Portlashlar Kirovograd viloyatidagi Kropyvnitskiyda ham eshitildi, deb xabar berdi “Suspilne” telekanali. Hujum oqibatlari haqida hozircha ma’lumot berilmagan. Ukraina ommaviy axborot vositalarining xabar berishicha, portlash Sumi shahrida sodir bo‘lgan. uning sababi hozircha noma’lum.
Rossiya Mudofaa vazirligi hozircha Ukrainaga uyushtirilgan ommaviy hujumga izoh bermadi.
Izoh (0)