Rossiya qiruvchi samolyotlarini havoga ko‘tardi: Ukraina bo‘ylab havo hujumidan ogohlantirish e’lon qilindi

Ukraina bo‘ylab 10-fevral kuni ikkinchi marta havo hujumidan ogohlantirish tizimi ishga tushdi. Bu haqda UNIAN xabar berdi.

“Belarusskiy Gayun” monitoring guruhi ma’lumotlariga ko‘ra, Belarusning Machulishi aerodromida “Kinjal” gipertovushli raketalarini tashishga qodir uchta Rossiyaning “MiG-31K” qiruvchi samolyoti havoga ko‘tarilgan. Shuningdek, Belarusda Rossiyaning A-50U uzoq masofali radarlarini aniqlash va boshqarish samolyotlari parvozi qayd etilgan.

Ukrainada 10-fevral kuni mahalliy vaqt bilan soat 8:20 dan so‘ng Rossiyaning raketa zarbalari ehtimoli yuqoriligi sababli mamlakat bo‘ylab havo hujumi haqida ogohlantirish e’lon qilindi. Soat 12:14 da Kiyev osmonida havo hujumidan mudofaa kuchlari 10 ta raketani urib tushirdi. Shahar meri Vitaliy Klichko elektr uzilishlari kuzatilgani, qurbonlar yo‘qligini aytdi.

Avvalroq Ukraina armiyasi janglarning shiddatli borishi tufayli snaryadlar taqchilligiga duch kelayotganini ma’lum qilgandi. Zelenskiy tanklardan keyin G‘arbdan samolyot va raketalar olishni ham kutmoqda.