Rossiya armiyasi 18-yanvarga o‘tar kechasi Kiyevga ballistik raketalar va dronlar bilan hujum qildi, deb xabar berdi shahar meri Vitaliy Klichko.
Uning aytishicha, Shevchenko tumanida bombardimon oqibatida noturar joyda yong‘in chiqqan.
Kiyev shahar harbiy ma’muriyati boshlig‘i Timur Tkachenko aniqlik kiritib, Shevchenko tumanidagi hujum oqibatida to‘rt kishi halok bo‘lgani va yana uch kishi jarohat olgani haqida ma’lumot berdi. Uning qo‘shimcha qilishicha, urib tushirilgan snaryadlar parchalari poytaxtning Desnyansk va Goloseev tumanlariga tushgan.
Ukraina Favqulodda vaziyatlar davlat xizmati ma’muriy bino, biznes markaz va do‘konning qisman vayron bo‘lganini ma’lum qildi. Shuningdek, o‘nta avtomashina shikastlangan. Bundan tashqari, “Lukyanovskaya” metro bekati kirish qismi shikastlangani sababli vaqtincha yopilgan. Shevchenko tumanida suv ta’minoti quvuri shikastlangan.
18-yanvar kuni ertalab Rossiya qo‘shinlari Zaporojye markaziga ballistik raketalar bilan zarba berdi. Zaporojye viloyati davlat ma’muriyati rahbari Ivan Fedorovning xabar berishicha, hujum oqibatida ma’muriy binolar vayron etilgan, turar joylar va shaxsiy transport vositalari shikastlangan. 10 kishi jarohat olgan: ikki kishiga voqea joyida tibbiy yordam ko‘rsatilgan, sakkiz kishi kasalxonaga yotqizilgan.
Ukraina QK Havo kuchlari qo‘mondonligi 18-yanvarga o‘tar kechasi Rossiya qo‘shinlari 39 ta Shahed tipidagi zarba beruvchi dronlar, shuningdek, to‘rtta Iskander-M/KN-23 ballistik raketalarini uchirganini ma’lum qildi. Ukraina havo hujumidan mudofaa kuchlari Poltava, Sumi, Xarkov, Cherkasi, Chernigovsk, Kiyev, Xmelnitskiy, Jitomir, Kirovograd, Dnipropetrovsk, Xerson va Donetsk kabi viloyatlarda ikkita raketa va 24 ta dronni urib tushirishga erishdi.
Izoh (0)