Fyuri—Usik 2. Qarama-qarshilik tarixi, bokschilarning gonorari va translyatsiya haqida ma’lumotlar

Oleksandr Usik va Tayson Fyuri o‘rtasidagi revansh jangi joriy yilning oxirida bo‘lib o‘tadi. Jang 21-dekabr kuniga belgilangan.

Saudiyaning Ar-Riyod shahri ushbu janggi mezbonlik qiladi. Bokschilar mahalliy Kingdom Arena stadionida to‘qnash keladi.

Fyuri—Usik 2 jangini qayerda va qachon tomosha qilish mumkin?

Hozircha jangning qaysi vaqtda boshlanishi rasman e’lon qilinmagan. Biroq, odatda, Saudiyada bo‘lib o‘tadigan boks musobaqalari Toshkent vaqti bilan yarim tunga to‘g‘ri keladi.

Masalan, Usik va Fyuri o‘rtasidagi dastlabki jangning asosiy kardi 21:00 da start olgan va asosiy jang erta tongga yaqin bo‘lgandi.

Shuningdek, hozircha O‘zbekistonning birorta kanalida translyatsiya borasida xabar yo‘q.

Tayson Fyuri va Oleksandr Usik qarama-qarshiligining tarixi

Fyuri va Usik dastlabki jangdan oldin ham bir necha bor to‘qnash kelishga yaqin bo‘lgan. Biroq har safar qandaydir sabablar tufayli jang bekor bo‘lavergandi. Nihoyat, 17-may kuni jang bo‘lib o‘tdi va unda ukrainalik bokschi ochkolar evaziga g‘alaba qozondi.

Tayson Fyuri: biografiyasi va boksdagi faoliyati

Tayson Fyuri 1988-yil 12-avgust sanasida Manchesterda tavallud topgan. Otasi Jon Fyuri ham boks bilan shug‘ullangan va Mayk Taysonning ashaddiy muxlisi bo‘lgan. Shuning uchun farzandining ismini amerikalik bokschi sharafiga qo‘ygan. Taysonning amakisi Piter Fyuri esa uning murabbiyi hisoblanadi. Fyuri havaskor boksda 35 ta jang o‘tkazib, 31 ta g‘alaba qozongan.

Tayson Fyurining bo‘yi — 206 sm, so‘nggi jangidan oldingi vazni — 118,8 kg.

Tayson Fyurining statistikasi

“Lo‘lilar qiroli” laqabini olgan Fyurining professional rekordi — 34 ta g‘alaba, bitta mag‘lubiyat va bitta durang. 24 ta jangini muddatidan avval yakunlagan.

Professional faoliyati

Taysonning faoliyati 2008-yil dekabr oyida boshlangan, dastlabki jangining birinchi raundida Belu Gongosini texnik nokautga uchratgan. Dastlabki 7 jangida Fyuri muddatidan oldin g‘alaba qozongan, 8-jangini esa kamar uchun o‘tkazgan: 10 raund davom etgan jangda Jon Makdermottni mag‘lub etib, BBBofC English Heavy kamarini qo‘lga kiritgan.

Professional faoliyatidagi 25-jangini esa 2015-yil noyabr oyida Vladimir Klichkoga qarshi o‘tkazib, g‘alaba qozongan holda 4 ta nufuzli titulga ega chiqqan. 31-jangida esa (2020-yil) Deontey Uaylderni taslim etib, WBC titulini qo‘lga kiritgan.

So‘nggi jangi

Tayson Fyuri so‘nggi jangini 2024-yilning 17-may sanasida Oleksandr Usikka qarshi o‘tkazib, ochkolar hisobiga mag‘lubiyiatga uchradi. Shu tariqa britaniyalik bokschi barcha kamarlarini Usikka yutqazib qo‘ydi.

Navbatdagi jangi

Fyurining keyingi jangi haqida hozircha ma’lumotlar yo‘q. Agarda Oleksandr mag‘lub etilsa, ular o‘rtasidagi uchinchi jang tashkil etilishi mumkin.

Tayson Fyurining hozirgi reytingi qanday?

“Lo‘lilar qiroli” BoxRec talqiniga ko‘ra vazn toifasidan qat’i nazar tuzilgan reytingda 46-o‘rinni egallab turibdi.

Oleksandr Usik: biografiyasi va boksdagi faoliyati

Oleksandr Usik 1987-yil 17-yanvarda Simferopolda tavallud topgan. Usik bolaligida milliy raqs, dzyudo va futbol bilan shug‘ullangan. “Tavriya” yoshlar jamoasida chap qanot yarim himoyachisi pozitsiyasida harakat qilgan.

Usikning bo‘yi — 191 sm, so‘nggi jangidan oldingi vazni — 101,4 kg.

Oleksandrning statistikasi

Usikning professional boksdagi rekordi — 22 g‘alaba va birorta mag‘lubiyat yo‘q. 14 ta jangini muddatidan avval yakunlagan.

Usikning professional faoliyati

Oleksandrning faoliyati 2013-yilning noyabr oyida boshlangan va ilk jangida Felipe Romeroni 5-raunddayoq texnik nokautga uchratgan. Dastlabki 9 jangida Usik muddatidan avval g‘alaba qozongan.

10-jangida Usik ilk bor asosiy kamar uchun jang qildi: 2016-yilning sentyabr oyida 12 raund davom etgan jangda Kshishtof Glovatskiyni yengib, WBO tituliga ega chiqdi. 15-professional jangida Usik Murat Gassiyev ustidan g‘alaba qozonib, jahon chempioniga aylandi.

Usikning so‘nggi janggi natijasi

Oleksandr Usik 2024-yilning 17-may sanasida Tayson Fyuriga qarshi ringga ko‘tarildi. Ukrainalik bokschi hakamlar qaroriga ko‘ra, g‘alaba qozondi va og‘ir vazn toifasida mutlaq jahon chempioniga aylandi.

Keyingi janggi

Hozircha bu haqida hech qanday ma’lumot yo‘q. Fyuriga mag‘lub bo‘lsa, ular o‘rtasidagi uchinchi jang bo‘lib o‘tishi mumkin. Undan tashqari Entoni Joshua va Daniel Dyubuaga qarshi ehtimoliy janglar bo‘lib o‘tishi ko‘zda tutilgan.

Usikning reytingi

Ukrainalik bokschi BoxRec talqiniga ko‘ra vazn toifasidan qat’i nazar tutilgan reytingda 14-pog‘onani egallab turibdi.

Gonorarlar

Fyurining Usikka qarshi jangdan olgan gonorari ochiqlanmagan, biroq Independent nashrining xabariga ko‘ra, birinchi jangdan britaniyalik bokschi 150 million dollar ishlab topgan.

Usikning ham gonorari borasida aniq ma’lumot yo‘q. Avvalroq ukrainalik bokschi Fyuriga qarshi jangdagi umumiy gonorar budjetining 30 foizini olgani aytilgandi. Bu 65 million dollarga to‘g‘ri keladi.

Usik — Fyuri: OAV bilan muloqot

“U bilan jang qilish kutganimdan osonroq kechdi. Odam unga zarba berish qiyin deyishardi, lekin men turli kombinatsiyalarni qo‘llab ko‘rdim va uning ustidan kula oldim. Ehtimol, muammo men juda quvnoq bo‘lganimdadir. Ba’zan oldimda havaskor bokschi turgandek his qildim. Men bu jangdan zavq oldim”, — deydi Tayson Fyuri jurnalist Maykl Benson bilan suhbatda.

“Bu safar gonorar mening foydamga kattaroq narxda bo‘ladimi? Aniq emas. Birinchi imzolangan shartnomamda revansh haqida band bore di. Revanshning moliyaviy tomonlari yozilgan edi. 90 million menga, 60 million Fyuriga? Shunaqa bo‘lsa, zo‘r bo‘lardi. Har birimizning Saudiya Arabistoni bilan shaxsiy bitimimiz mavjud. Uni ochiqlash mumkinmas. Raqamlar umuman oshkor etilmadi”, — deydi Usik.

Usik—Fyuri 2 uchun fikr

“Menimcha, Fyurining otasi chetroqda turgani ma’qul. U shunday qilishga majbur. Istalgan murabbiy aytishi kerak bo‘lgan gapni aytaman: sizning burchagingizda ikkinchi murabbiy yoki yordamchi bo‘lishi mumkin, biroq siz barcha bahslarni raundlar paytida qilishingiz kerak bo‘ladi. Raundlar orasida esa faqat bitta ovoz yangrashi lozim. Aks holda jangchi o‘zini yo‘qotib qo‘yadi va: “Qaysi birini eshitishim kerak, jin ursin?”, deya o‘ylaydi. Tayson bilan tanaffus paytida faqat bir kishi gaplashishi kerak”, — deydi afsonaviy bokschi Rikki Hatton.

Revansh oldidan faktlar:

— Jang uchta kamar uchun kechadi — iyun oyida Usik IBF kamaridan voz kechgandi, endilikda bu kamar Daniel Dyubuaga tegishli;

— Revansh — Birinchi jangning natijasidan qat’iy nazar bokschilarning shartnomasida ikkinchi jang mavjud edi. Lekin Fyuri g‘alaba qozongan taqdirda, trilogiya haqida hech kim gapirmagan;

— Bu Usik uchun faoliyatidagi ikkinchi dilogiya bo‘ladi (birinchisi Joshuaga qarshi edi), Fyurida esa allaqachon ikkita dilogiya mavjud (Uaylder va Chisoraga qarshi); 

— Agar Tayson revanshda g‘alaba qozonsa, XXI asrda og‘ir vazn toifasida uch karra chempion bo‘lgan uchinchi bokschiga aylanadi, bundan avval Lennoks Lyuis va Vitaliy Klichko bu vazifani uddalagan. Lekin Entoni Joshuada bu missiyani 3 oy oldin bajarish imkoniyati mavjud.