Plastik jarrohlik bizning davrimizda shu qadar taraqqiy etganki, uning yordamida insonlar juda qisqa vaqt ichida tanib bo‘lmas darajada o‘zgarishi mumkin. Ba’zi yulduzlar o‘z uslublarini ana shu usulda, boshqalar esa sport va kosmetik muolajalar orqali ideal parametrlarga o‘zgartiradi.
Deyv Batista
Amerikalik aktyor Deyv Batista bir necha hafta avval Toronto kinofestivalida o‘zining yangilangan tashqi ko‘rinishi bilan barcha muxlislarini hayratda qoldirdi: kino yulduzi bir yilda 34 kilogrammdan xalos bo‘lgan edi. Muxlislar hatto Deyvning salomatligidan xavotirlana boshladi, ammo u hammasi yaxshi ekanini aytdi:
“Menda ortiqcha vazn ko‘payib ketgani uchun ozishga qaror qildim. Chunki turli rollarni ijro etish uchun juda xunuk ko‘rinishga kelgan edim. Doimiy qovurilgan kartoshka va quymoq, fastfud kabilar tufayli vaznim 142 kilogrammga yetgan edi. Hozirda o‘z tashqi ko‘rinishimdan mamnunman”, dedi Batista.
Mashin Gan Kelli
Aktrisa Megan Foksning qallig‘i, musiqachi Mashin Gan tatuirovkalar ishqibozi. 2024-yil fevraliga qadar uning tanasida 90 ga yaqin suratlar tushirilgan edi. So‘ng Kelli ularning bir qismidan xalos bo‘lishga qaror qildi. Yo‘q, u tatuirovkalarni o‘chirmadi, shunchaki ularni yana bir qatlam tatu bilan yopib tashladi.
Buning uchun musiqachiga ikki oydan ko‘proq vaqt kerak bo‘ldi. Tatularni chizish uchun haftada to‘rt kun, kuniga olti soatdan vaqt ketdi. Yulduzning so‘zlariga ko‘ra, bu amaliyot o‘tmishdan va avvalgi xotiralaridan voz kechishning bir yo‘li bo‘lgan.
Kristina Agilera
Amerikalik qo‘shiqchi Kristina Agilera bugungi kunda o‘z vazniga jiddiy e’tibor qaratib kelmoqda. Ijtimoiy tarmoqlardagi so‘nggi fotosuratlar buni tasdiqlaydi. Bir necha yil avval xonanda farzandli bo‘lgani, ajrashgani va otasining o‘limidan tashqari, karyerasi bilan bog‘liq muvaffaqiyatsizlik sabab 30 kilogramm vazn to‘plagan va yoga yordamida undan xalos bo‘lgan. Qo‘shiqchining so‘zlariga ko‘ra, ozishdagi eng asosiy qoida bu — intizom.
Kristinaning diyetasida shirinliklar yoki non mahsulotlari yo‘q va kuniga 1600 kilokaloriyadan ortiq iste’mol qilmaydi. Shuningdek, yulduz muntazam ravishda yoga va boks bilan ham shug‘ullanadi.
Zak Efron
Yaqinda internet foydalanuvchilari Efronning tashqi ko‘rinishi sezilarli darajada o‘zgarganini payqadi. Aktyorning o‘zi ikki yil avval jag‘i singanidan keyin yuzi shakli o‘zgarganini aytgan edi. Shuningdek, yuz ko‘rinishini estetik jihatdan yanada yaxshilash uchun aktyor botoks terapiyasiga murojaat qildi.
Kendal Jenner
Kardashyanlar va Jennerlar oilasi muxlislarini hayratda qoldirishdan charchamaydi. 28 yoshli amerikalik supermodel Kendal Jenner Parij moda haftaligining ochilishida yangi obraz bilan namoyon bo‘ldi. Mallasoch ayol obrazi modelga yarashganini ko‘plab ishtirokchilar e’tirof etdi.
Izoh (0)