Joriy yil 1-yarmida banklar va aholi o‘rtasidagi chet el valyutasi savdosi hajmi 24 foiz o‘sdi. Bu haqda Markaziy bankning navbatdagi sharhida maʼlum qilindi.
Olti oy ichida O‘zbekistonda 14,5 mlrd dollarlik xorij valyutalari oldi-sotdi qilindi. Bu 2024-yil mos davridagidan 2,8 mlrd dollarga ko‘p.
Banklar aholidan 9,1 mlrd dollar (bir yil avvalgidan 27 foiz ko‘p) chet el valyutasi xarid qilgan. Aholi esa banklardan 5,4 mlrd dollarlik valyuta sotib olgan.
Pul savdosining 8,4 mlrd dollari valyuta ayirboshlash shoxobchalarida amalga oshirilgan. Qolgan 5,9 mlrd dollar onlayn, 252 mln dollar esa bankomatlar orqali oldi-sotdi qilingan.
Maʼlumot uchun, 2024-yilda banklar va jismoniy shaxslar o‘rtasidagi chet el valyutasi savdosi hajmi 25,5 mlrd dollarga yetgan (2023-yilda 21,1 mlrd dollar). Bunda aholi banklarga 16,1 mlrd dollar sotgan, 9,4 mlrd dollarlik chet el valyutalarini xarid qilgan.
Mamlakatda dollar eng ko‘p oldi-sotdi qilinadigan valyuta bo‘lib qolmoqda. Masalan, 2025-yil I chorakda aholi va banklar o‘rtasidagi AQSH valyutasi savdosi hajmi 6,4 mlrd dollarni tashkil etgan. 2023-yil mos davrida bu raqam 5,2 mlrd dollar bo‘lgandi.
Izoh (0)