Odatda san’atkorlar muxlislar quvonchiga sherik bo‘lishadi. Muxlislar ham sevimli ijodkoridan faqat pozitiv kayfiyat kutishadi. Ammo mashhurlar ham hamma qatori oddiy inson. Ularning ham o‘ziga yarasha tashvishlari, dardlari bor. Quyida sizga hayotida og‘ir judolikka uchraganiga qaramay, kulib xalq xizmatida bo‘lishga majbur bo‘lgan san’atkorlar haqida hikoya qilmoqchimiz.
Xosiyat Husanova onasi vafot etganini Samarqanddagi to‘yda eshitgan
Foto: Instagram / @xosiyat_xusanova
Aktrisa Xosiyat Husanova onasi vafot etganini Samarqanddagi to‘yda eshitgani va shoshib Andijondagi ota hovlisiga kelgani haqida so‘zlab berdi.
— Onam ketma-ket infarkt va insultga chalinib, davolangach, ahvoli biroz yaxshilangandi. Ammo oradan hech qancha vaqt o‘tmay yana xastalik qaytaladi. Onamni ko‘rgani borsam, “Men o‘laman, tayyor tur. Faqat bir iltimos o‘lganimdan keyin ham uyimga kelib, jigarlaringni to‘plab Qur’on tilovat qilgin. Keyin yaqinlaringga beradigan moddiy yordamingni to‘xtatmagin”, dedi. Aksiga olib ertangi spektaklda ishtirok etishim kerak edi, dublyorlarim esa o‘rnimga chiqishga vaqtlari yo‘qligini aytishgan. Buning ustiga o‘sha vaqt teatrdan tinmay qo‘ng‘iroq qilishdi. O‘shanda onam “Qachon o‘lishim noma’lum, ishdan qolma”, deb poytaxtga ketishimga ko‘ndirdi.
Spektaklda rol o‘ynab, ertasi kuni tongda Samarqanddagi to‘yga ketganman. To‘y avjida, biror xabar kelsa deb telefonimni qo‘limdan qo‘ymayman. Shu payt uydan qo‘ng‘iroq bo‘ldi va onam omonatini topshirganini aytishdi. Mikrofonni yordamchi hofizga berib, ichkari xonaga kirdim va chuqur nafas oldim. Ortimdan to‘y egalari kirib, nima bo‘lganini so‘rashdi. Onam o‘lganini bilishgach, to‘yni tugatmasdan ketishimga ruxsat berishdi. Haq olmayman, deyishimga qaramay, pulni mashina eshigidan tashlab “Sizning haqqingiz, biz rozimiz”, deyishgandi. Samarqanddan Andijonga kelguncha ichimdan nimalar o‘tganini tasvirlab berolmayman, deydi aktrisa.
Hosila Rahimova otasidan judo bo‘lganidan ko‘p o‘tmay, konsert bergan
Foto: Instagram / @hosila_singer
O‘zbekistonda xizmat ko‘rsatgan artist Hosila Rahimovaning otasi Ibrohim hoji 2006-yilning 10-mart sanasida vafot etgan. Xonanda oradan hech qancha vaqt o‘tmay, “Xalqlar do‘stligi” san’at saroyida yangi konsert dasturini namoyish etgan.
— Otamning o‘limi oilamiz uchun og‘ir zarba bo‘lgan. Ko‘nglimga hech nima sig‘maydigan ahvolda bo‘lsam ham bayram dasturlarida ishtirok etishga majbur bo‘lganman. Eng yomoni, yakkaxon konsert dasturimga ham hech qancha vaqt qolmagandi. Uni ortga sursammikan, deb o‘yladim, ammo atrofimdagi insonlar ko‘nishmadi. Ko‘nglimga qil sig‘maydigan paytda konsertda qo‘shiq aytib kuylaganman. Ota haqidagi qo‘shiqni aytganimda butun zal yig‘lagan, ammo sahna etikasiga xilof ish qilmaslik uchun o‘zimni qo‘lga olganman. Sahnada kulib, konsertdan keyin rosa yig‘laganman, deydi xonanda.
Otabek Mirzaxolov: “Otam vafot etganida konsertda chiqish qilishga Jahongir Poziljonov ko‘ndirgan”
Foto: Instagram / @otabekmirzaholov
“Bravo” jamoasining a’zosi Otabek Mirzaxolov uchun 2018-yilgi konsert juda qiyin kechgan. Chunki konsert boshlanishidan bir kun avval Otabekning padari buzrukvori vafot etgan.
— U kunlarni eslash men uchun juda og‘ir. Konsertga tayyorgarlik avjida edi, 10-sentyabr kuni tongda otam vafot etdi. Yig‘lab turib, odamlarni kuldirish oson emas. Shu bois konsertga chiqmayman, dedim. Ammo bir kun qolganda konsert rejasini o‘zgartirish hamkasblarim uchun noqulaylik tug‘dirishini ham yaxshi bilardim.
O‘shanda ustozim Jahongir Poziljonov kelib, onam bilan uzoq suhbatlashgandi. Keyin meni chaqirishdi. O‘shanda qabristondan endigina qaytgandim. Xullas, ular menga bu vaziyatda o‘zimni qo‘lga olishim kerakligini va ko‘plab san’atkorlarning boshiga xuddi shunday musibat tushganini aytishdi. Kechga yaqin ustozim hamrohligida Toshkentga yo‘l oldik. O‘sha yilgi konsert dasturidagi ishtirokim nihoyatda qiyin kechgandi, deydi Otabek Mirzaxolov.
Mavluda Asalxo‘jayeva: “Otam ularga atab aytgan qo‘shig‘imni eshitishga ulgurmagan”
Foto: Instagram / @mavludauz
O‘zbekistonda xizmat ko‘rsatgan artist Mavluda Asalxo‘jayevaning otasi Abdurahmon hofiz ham qizining yakkaxon konsert dasturi kuni vafot etgan.
— U kun sahnaga chiqishim juda og‘ir kechgan. Eng alam qilgani o‘sha yilgi dasturda ilk marta otamga bag‘ishlab qo‘shiq aytishni rejalashtirgandim. Bir kun avval ukalarim “Qo‘shiqni dadamga aytib bering” deyishganda “Yo‘q, ertaga konsertda eshitadilar”, degandim. Dadam konsert uchun atayin Toshkentga kelgandi. “Necha kun bo‘lasiz” deganimda “Konsertining besh kunida ham yoningda bo‘laman” degandi. Afsuski, konsertning ilk kunida — erta tongda jonlari uzildi.
Konsertni qoldirishning iloji bo‘lmagani uchun ko‘zlarim shishib, katta sahnaga chiqishga majbur bo‘lganman. Ayniqsa, otamga bag‘ishlangan qo‘shiqni aytganimda butun zal yig‘lagandi. Eng qizig‘i, ilk konsert kunida ko‘rinish bergan kapalak konsertning beshinchi kuniga qadar uchib ketmagan. Armonim haqida ko‘p so‘rashadi — men o‘sha yilgi konsertda xalqqa otamni tanishtirib, unga atalgan qo‘shiqni aytishni reja qilgandim. Afsuski, bu menga ushalmas armon bo‘lib qoldi. Ulg‘ayganimda yetim bo‘lib qoldim, deydi xonanda.
Shukurullo Isroilov: “Onam vafot etganini to‘yda eshitdim”
Foto: Instagram /@shukurullo_isroilovoriginal
Ikki yoshida otasidan ayrilgan qiziqchi Shukurullo Isroilov 2015-yilda onasidan ham ayrildi. O‘sha kuni u Buxoroda to‘yda edi.
— 2015-yili 27-mart kuni onam rahmatli 80 yoshni qarshilagandi. Onamni sanatoriyga davolatgani yotqizgandim, ammo ertalab u yerga borib tabrikladim. Tandir go‘sht va shirinliklar buyurtma qilib, dasturxon yozdik. Ammo uzoq qololmadim. Chunki shu kuni kechqurun Buxoroda to‘yim bor edi. To‘y qizigan paytda “Onangiz vafot etdi” degan sovuq xabar keldi. Amallab to‘yni tugatib, Toshkentga qaytdim. 28-mart kuni peshinda onamga janoza namozi o‘qildi. O‘sha kuni “Mirzo” teatrining navbatdagi konsertiga start berilardi. Mirzabek akaning oldiga kelib, konsertda chiqolmasligimni aytdim. Hammaning boshi qotgan bir necha soatdan keyin konsert, sahnalarning barchasi bir-biriga uzviy bog‘liq.
Tomoshani qoldiraylik desak, chiptalar to‘liq sotilgan. Shunda ustozlar menga qanchalik og‘ir bo‘lsa ham, konsertda chiqishim kerakligini aytishdi. Konsert boshlandi, odamlar kulaman deb kelgan men esa ich-ichimdan yig‘layman. Ammo muxlislarga musibatda ekanimni bildirganim yo‘q. Ammo Mirzabek aka konsert so‘ngida “Shukurullo bugun onasidan ayrildi, ammo sizlarni hurmat qilib konsertga keldi” deganda butun zal qarsak chalgandi, deydi Shukurullo Isroilov.
Dilshod Musabekov: “Yig‘lab turib, odamlarni kuldirish qiyin”
Foto: Instagram / @dilshodbek_musabekov_dizayn
“Dizayn” kulgi jamoasining a’zosi Dilshodbek Musabekov 2012-yil otasi vafot etgan kunning ertasiga konsert dasturida ishtirok etishiga to‘g‘ri kelgan. Afsuski, kasb mas’uliyati sabab u dardini ichga yutib, xalqni kuldirishga majbur bo‘lgan.
— Dadamni yo‘qotish juda og‘ir bo‘lgan. Ertasi kuni konsert bo‘lishi kerak, ammo ko‘nglimga qil ham sig‘maydigan holatda edim. Jamoadagi yigitlar kelib “Istasangiz, konsertni qoldiramiz. Hech qanday muammo bo‘lmaydi, xavotir olmang” deyishdi. Chunki ularning ham ahvoli u qadar yaxshi emasdi. Biz avvaldan oilaviy do‘st bo‘lganimiz uchun bir-birimizning quvonch-u, g‘amimizga sherik edik. Shunda onam nima bo‘lgan taqdirda ham sahnaga chiqishib kerakligini va belgilangan konsertni qoldirishga haqqim yo‘qligini tushuntirdi. Xo‘p, deb konsertda ishtirok etdim. Yig‘lab turib odamlarni kuldirish naqadar og‘ir ekanini o‘shanda bilganman, deydi Dilshodbek Musabekov.
Yulduz Usmonova: “To‘yga chiqib ketayotganimda akam vafot etgani haqida xabar kelgan”
Foto: Instagram / @yulduzibragimovnausmonova
O‘zbekiston xalq artisti Yulduz Usmonova kasb mas’uliyati sabab katta akasi vafot etganda, to‘ylar sabab janozaga kechikib borgani haqida so‘zlab bergandi.
— Kiyinib, to‘yga chiqib ketyapman “akangiz vafot etdi”, degan xabar keldi, qotib qoldim. Nima bo‘lgan taqdirda ham ishimni tugatishim kerakligini his qilib, xizmatimni ko‘ngildagidek ado qilganman. Faqat oxirgi to‘ydagi so‘nggi qo‘shiqni aytayotganimda yig‘lab yuborganman. Ungacha muxlislarni dardimga sherik qilishni istamaganman. Janozaga biroz kechikib bo‘lsa-da, yetib borganman. Chunki bizda hozirgi ba’zi xonandalarda yo‘q kasb mas’uliyati bor. San’atkor bunday vaziyatlarga hamisha tayyor bo‘lishi kerak, deydi Yulduz Usmonova.
Izoh (0)