Merilin Monro
Asl ismi Norma Jin bo‘lgan aktrisa 1926-yil 1-iyunda Los Anjelesda dunyoga kelgan. Qiziga nisbatan mehr va muhabbatni his qilmagan ona, uni tarbiyalash uchun o‘ziga to‘q oilaga berib yuborishga qaror qilgan. Qizaloq ulg‘ayganida onasi uni qaytarib oladi. Biroq Merilin o‘gay otasining tegajog‘liklariga dosh bera olmay, xolasinikiga qochib ketadi. Biroq qizaloq xolasining o‘g‘illari bilan til topisha olmay, u yerda ham ko‘p yashay olmaydi. U 16 yoshga to‘lganida yashash uchun muqim joyi bo‘lishini istab, qo‘lini so‘ragan yigitga turmushga chiqadi. Bo‘lajak aktrisa Ikkinchi jahon urushi paytida aviatsion zavodda, undan so‘ng esa modellik agentligida ishlagan.
Stiv Jobs
Stiv Jobs 1955-yil 24-fevralda San Fransiskoda dunyoga kelgan. Biologik ota-onasi bolakay dunyoga kelganidan bir hafta o‘tib undan voz kechgan. Uni farzandiga borini berishga tayyor amerikalik Pol va Klara ismli juftlik asrab olgan. Maktab davridayoq elektronikaga qiziqqan Jobs, Hewlett-Packard kompaniyasi rahbarining e’tiborini jalb qilgan. Asrab olgan ota-onasi uni qo‘llab-quvvatlamagan, qiyin kechgan bolalik bo‘lajak biznesmenning fe’l-atvorida iz qoldirgan. Jobs butunlay murosasiz va xodimlariga nisbatan talabchan bo‘lgan.
Koko Shanel
Modelyer va XX asrning eng mashhur dizaynerlaridan bo‘lgan Gabriyel Bonel Shanel 1883-yil 19-avgustda Fransiyada dunyoga kelgan. Onasi vafot etgan, otasi esa farzandlarining tarbiyasi haqida qayg‘urmagan. Bolaligini yetimxonada o‘tkazgan Koko uzoq vaqt davomida hayotining bu qismini esga olishni ham istamagan. Uni asrab oladigan oila bo‘lmagan. Yetimxonani tark etgach, muvaffaqiyatli modelyer bo‘lish istagida trikotaj sotiladigan do‘konga ishga kirgan. Jiddiy uslubdagi bolalar formasiga bo‘lgan nafrat uni ayollar garderobidagi yangi liboslarni yaratishga ilhomlantirgan. Intilishlari va harakatlari bilan Koko moda olamida o‘z o‘rnini topishning uddasidan chiqqan.
Pirs Brosnan
“Jeyms Bond” yulduzi Pirs Brosnan 1953-yil 16-mayda Irlandiyada dunyoga kelgan. Otasi u tug‘ilgandan ko‘p o‘tmay oilasini tark etishga, onasi esa farzandini o‘z ota-onasiga qoldirib, Londonda yangi hayot boshlashga qaror qilgan. Buvisi va bobosining vafotidan keyin Pirs tog‘asi va xolasining qo‘lida qolgan. Ular ham bolaga g‘amxo‘rlik qilishni istamay, uni diniy muassasaga topshirib yuborgan. Bir necha yil o‘tib onasi o‘g‘li borligini eslab, uni Londondagi yangi oilasiga olib kelmoqchi bo‘lgan. Ammo shunda ham ularning o‘rtasidagi munosabatlar yaxshilanmagan.
Jek Nikolson
Jek Nikolsonning onasi — Jun Frensis Nikolson o‘z davrining mashhur raqqosasi edi. U 1937-yil, 18 yoshida ona bo‘lgan. Karyerasini davom ettirishni istagani sabab ham homiladorligini yashirib yurgan. Jek dunyoga kelganidan keyin uni onasining o‘g‘li sifatida ro‘yxatga olinishiga erishgan. Jek haqiqatni oradan 36 yil o‘tib, jurnalistik tekshiruv natijasida bilishga muvaffaq bo‘lgan. Ammo bu vaqtga kelib onasi ham, buvisi ham hayotdan ko‘z yumgan edi.
Izoh (0)