Qozog‘iston Milliy xavfsizlik qo‘mitasi “QirSabyn” (“KirSovun”) nomli anonim Telegram kanali adminlarini qo‘lga oldi. Ular mashhur kishilardan salbiy ma’lumotlarni e’lon qilmaslik evaziga pul talab qilganlikda gumonlanmoqda. Bu haqda Orda.kz xabar berdi.
Adminlar ustidan taniqli teleboshlovchi va inflyuenser-bloger shikoyat qilgan. Shundan so‘ng huquqni muhofaza qiluvchi organlar jinoiy ish qo‘zg‘atgan. Kanal mualliflari blogerdan shaxsiy hayotiga oid ma’lumotlarni oshkor etmaslik uchun pul talab qilgan.
U bosim va tahdidlar ostida uch ming dollar to‘lagan, ammo ta’qib davom etavergan. Shundan so‘ng jabrlanuvchi ariza yozishga majbur bo‘lgan, deyiladi xabarda.
Messenjerlardagi yozishmalar va pul o‘tkazmalari adminlarning aybdorligini tasdiqlagan. Anonim adminlarni topish qiyin bo‘lmagan. Ularning shaxsiy yozishmalari ortidan tovlamachilikka uchragan boshqa qurbonlar ham aniqlangan.
Anonim shaxslar o‘ta ehtiyotsizlik bilan ish tutgan — ular ochiqchasiga jim turish evaziga haq talab qilgan va go‘yo o‘zlarining jazosiz qolishlariga ishongan, deydi Orda.kz manbasi.
“QirSabyn” anonim kanali qariyb 110 ming obunachiga ega bo‘lib, faqat shaxsiy hayot haqidagi ma’lumotlarga, boshqacha aytganda, yulduzlar, inflyuenserlar va hatto jamoat arboblari haqidagi ko‘pincha o‘ylab topilgan g‘iybatlarga ixtisoslashgan. Xususan, so‘nggi uchta post Olmaota jamoatchisi Sanjar Boqoyevga bag‘ishlangan. Eng oxirgisi 11-dekabr sanasiga to‘g‘ri keladi. Kanalning shiori: Har bir “toza”ning sovuni kir, lekin kir narsalar hech qachon toza bo‘lmaydi.
“Kompromat ishi”
O‘zbekistonda 2023-yil 27-yanvarda “Human” axborot portali direktori Xurshid Daliyev, sobiq Bandlik va mehnat munosabatlari vazirligi matbuot kotibi Mavjuda Mirzayeva, “O‘zbekneftgaz” kompaniyasi matbuot kotibi Siyovush Hoshimov qo‘lga olindi.
DXX organlari tomonidan fuqaro I.A.dan kelib tushgan murojaatga ko‘ra, fuqaro D.X. va boshqalarning Telegram’dagi “Kompromat.uzb” va boshqa kanallar orqali amalga oshirilgan jinoyatlarga aloqadorliklari sababli ularga nisbatan Jinoyat kodeksining 165-moddasi 2-qismi “v” bandi (tovlamachilik) bilan jinoyat ishi qo‘zg‘atilgan.
Ish bo‘yicha jami to‘rt kishiga hukm o‘qilgan, xususan, jurnalist Xurshid Daliyev, Siyovush Hoshimovga 7 yillik qamoq jazosi berilgan, Mavjuda Mirzayevaga ozodlikni cheklash jazosi qo‘llanib, sud zalidan ozod qilingan, Ahmadullo Ahmadjonovga esa 3 yil muddatga ozodlikni cheklash jazosi tayinlangan.
Tasdiqlangan ayblov xulosasiga ko‘ra mazkur jinoyat ishi bo‘yicha 19 nafar jabrlanuvchi va 10 nafar fuqaroviy da’vogar mavjud bo‘lib, jinoyat oqibatida ularga jami 5 milliard 138 million so‘m miqdorida moddiy zarar yetkazilgani aniqlangan.
Izoh (0)