Dunyo bo‘ylab olamshumul mashhurlikka erishgan bo‘lsa-da, hayoti fojialarga to‘la bo‘lgan yulduzlar (foto)

Millionlab dollar miqdorda gonorar olish, kino premyeralariga eng go‘zal liboslarda tashrif buyurish, qimmatbaho uylarda yashash — bularning bariga har kim havas ko‘zi bilan boqadi. Ammo hashamatli hayot doim ham baxt olib kelmaydi. Quyida o‘tmishda jiddiy ruhiy jarohatlar olgan, baxtini yo‘qotgan va  biz bilmagan turli musibatlarni boshidan kechirgan mashhurlar hayoti bilan tanishamiz

Kianu Rivz

Kianu Rivz Jennifer Saym bilan 1998-yildan uchrashishni boshlaydi, bir yildan so‘ng Saym homilador bo‘ladi, ammo Ava Archer Saym-Rivz ismli chaqaloq o‘lik tug‘iladi. Kianu va Jennifer bunday fojiani ko‘tara olmaydi va ajrashadi. Oradan ikki yil o‘tib ayol giyohvand moddalar ta’sirida avtohalokatda vafot etadi.Voqealardan besh yil o‘tgach, Kianu Rivz Parade nashriga intervyu bergan:

“Men marhum rafiqam va farzandimni sog‘indim, chunki ular hayotimning bir qismi edi. Agar ular tirik bo‘lganida edi, hayotimiz qanday bo‘lar ekan deb ko‘p o‘ylayman... Men endi hech qachon qaytib kelmaydigan yaqinlarimni tez-tez eslab turaman”.

Sharliz Teron

Sharlizdek latofatli va muvaffaqiyatli ayolga qarab, u bir vaqtlar boshidan kechirgan voqealarga ishonish qiyin. Aktrisa Janubiy Afrikada o‘sgan. Uning otasi ichkilikka ruju qo‘ygan zolim erkak bo‘lgan. Kunlarning birida ota uyga yana mast holatda keladi va ayoliga o‘ldirish bilan tahdid qiladi. Sharlizning onasi o‘zini himoya qilish uchun erini otib qo‘yadi, yosh qizaloq esa bularning guvohiga aylanadi.

Sud Sharlizning onasiga qo‘yilgan qotillik aybini olib tashlagan. Aktrisa bu haqda ABC News nashriga shunday degan:

“Men o‘sha voqeani aniq eslayman va onamni tushunaman, ularning o‘rnida men ham shunday ish tutgan bo‘lar edim”, — deydi aktrisa.

Jim Kerri

2000-yillarning boshlarida Jim Kerrining karyerasi ortga keta boshladi. Ehtimol, bunga aktyorning drama yo‘nalishida ishlagani sabab bo‘lgandir. O‘sha vaqtlarda Kerri “Beg‘ubor ongning abadiy porlashi”, “Oydagi odam” kabi filmlarda suratga tushgan.

Intervyulardan birida aktyor “Oskar”ni olishni orzu qilishi haqida aytgan, ammo uning na dramatik, na komediyali rollari e’tirof qilinmagan.

Jim Kerri hayotidagi eng katta zarba 2015-yilda sodir bo‘lgan: aktyor Katriona Uayt bilan ajrashgach, uning sobiq sevgilisi katta dozada kuchli dori ichib, o‘z joniga qasd qilgan. Sodir bo‘lgan voqealar tufayli Jim Kerri chuqur tushkunlikka tushib qolgan:

“Men uni ruhan kuchli ayol deb bilar edim va bizning ajralishimiz Katrionaga qattiq ta’sir qilishini xayolimga ham keltirmagan edim”, — dedi aktyor.

Rouz Makgouen

“Sehrlanganlar” teleserialidagi Peyj obrazini gavdalantirgan aktrisa Rouz Makgouenning bolaligi oson o‘tmagan. U Italiyada “Xudoning bolalari” deb nomlangan noqonuniy guruhda o‘sgan. Aholiga tashqi dunyo bilan aloqa o‘rnatishga ruxsat berilmagan sekta rahbarlari voyaga yetmaganlarga jinsiy tajovuz qilishini bilib qolgan Rouzning ota-onasi sektani tark etadi va Italiyadan AQSHga ko‘chib o‘tadi. Bu vaqtda Rouz 10 yoshda bo‘ladi.

Oradan bir necha yil o‘tgach, uni giyohvand moddalari iste’molida nohaq ayblashadi. Maxsus klinikadan buvisinikiga qochib ketgan bo‘lajak aktrisa u yerda ham xalovat topmaydi va yaxshi ko‘rgan yigiti bilan ketib qoladi.

Rouzning yigiti baxtsiz hodisadan vafot etgach, 2007-yilda aktrisaning o‘zi avtohalokatga uchraydi va yuzining bir qismi shikastlanadi. Operatsiya qildirganiga qaramay, Makgouen chehrasi hozirda avvalgidek emas.

Liam Nison

Liam Nison go‘zal aktrisaga uylangan, ularning oilasida ikki o‘g‘il dunyoga kelgan edi, ammo Nisonning baxti uzoq davom etmadi.

2009-yilda Natasha Richardson chang‘i uchayotganda boshi bilan yiqilib tushadi. Voqea joyida Natasha yomon lat yemagani va hammasi yaxshi ekanini ta’kidlaydi. Ammo zarba natijasida uning miyasida gematoma paydo bo‘ladi va oxir-oqibat aktrisa bevaqt vafot etadi.

Vudi Xarrelson

Vudi Xarrelson o‘z otasi aslida jinoyatchi va qotil ekanini bilganida juda yosh edi.  Uning ota-onasi bo‘lajak aktyor uch yoshligida ajrashadi va Charlz birinchi marta 7 yil muddatga qamaladi. So‘ng yana bir bor qotillikda ayblanib, unga umrbod qamoq jazosi tayinlanadi.

Vudi otasini kechirishi qiyin bo‘lgan, u 1968-yildan 1981-yilgacha padari bilan gaplashmagan. Ammo vaqt o‘tib qamoqxonaga Charlzni ko‘rgani bora boshlagan va hatto uni muddatidan oldin ozod qilish uchun apellyatsiya arizasini bergan.

Jek Nikolson

Doimiy bahoriy kayfiyatda yuradigan ushbu aktyor hech qachon qiyinchiliklarga duch kelmagan insonga o‘xshaydi. Ammo Jek Jikolson hayotida kutilmagan ishlar ko‘p bo‘lgan. Jumladan, 1974-yilda u kutilmaganda singlisi Djun aslida uning onasi ekanligini bilib qolgan. Aktyor bu vaqt 37 yoshda edi. Raqqosa va aktrisa yolg‘iz ona sifatida Gollivudda muvaffaqiyatli qozonish imkoniyati kamroq deb hisoblaydi va o‘g‘lini bobosi va buvisi qo‘liga topshirib, o‘zini Jekning opasidek tutadi. U1963-yilda saraton kasalligidan vafot etdi, ammo mashhur aktrisa bo‘lish orzusi ushalmay qolib ketdi.